Komisioni zgjedhor në Izrael nuk gjen prova për manipulim në zgjedhjet e javës së kaluar

Komisioni Zgjedhor i Izraelit njoftoi të mërkurën se nuk ka gjetur prova për manipulim në zgjedhjet e javës së kaluar, duke i dhënë një goditje përpjekjeve të kryeministrit Benjamin Netanyahu për të vënë në dyshim besueshmërinë e rezultateve.

Netanyahu dhe mbështetësit e tij kanë pretenduar vazhdimisht, pa paraqitur prova, se partitë e udhëhequra nga arabët i kishin “vjedhur” zgjedhjet, ndoshta edhe me ndihmën e faktorëve të huaj.

Rezultatet treguan se blloku fetaro-nacionalist i Netanyahut humbi shumicën parlamentare, ndërsa partitë arabe shënuan rritje të konsiderueshme të përfaqësimit, transmeton Telegrafi.

“Shqyrtimi nuk gjeti asnjë dëshmi për parregullsi që do të cenonin integritetin e zgjedhjeve ose do të ndikonin në rezultatet e tyre”, thuhet në deklaratën e komisionit.

Drejtori në detyrë i Komisionit Zgjedhor, Dean Livne, tha se hetimi kishte shqyrtuar “individualisht dhe në mënyrë të hollësishme” çdo ankesë, por nuk kishte gjetur prova që do të mbështesnin pretendimet se rezultatet ishin të pavlefshme.

Rezultatet, të cilat pritet të certifikohen zyrtarisht të mërkurën, “pasqyrojnë me saktësi zgjedhjet që votuesit kanë bërë në kutitë e votimit”, shtoi Livne.

Ndërkohë, një hetim i veçantë i shërbimit të inteligjencës Shin Bet lidhur me pretendimet për ndërhyrje të huaja në zgjedhje është ende në vazhdim, bëri të ditur një zëdhënës i Komisionit Zgjedhor.

Pas marrjes së rezultateve të certifikuara, presidenti i Izraelit, Isaac Herzog, do të nisë konsultimet me secilën prej partive të zgjedhura në parlament.

Pas dy ditësh konsultimesh, ai do të caktojë kandidatin që vlerëson se ka mundësitë më të mira për të formuar një qeveri koalicioni. Kandidatët kryesorë janë Netanyahu dhe rivali i tij, lideri i opozitës Gadi Eisenkot.

Megjithatë, as blloku i Netanyahut dhe as ai i aleatëve të Eisenkotit nuk arritën të sigurojnë shumicën parlamentare të nevojshme për formimin e qeverisë së re.

Kjo situatë lë të hapur mundësinë e një marrëveshjeje mes dy rivalëve politikë, por edhe të një koalicioni mes Eisenkotit dhe disa prej partive të udhëhequra nga arabët.

Nëse as Netanyahu dhe as Eisenkot nuk arrijnë të sigurojnë mbështetjen e nevojshme për formimin e qeverisë, Izraeli mund të mbajë zgjedhje të reja në fillim të vitit të ardhshëm. /Telegrafi/