Konkursi mbarëkombëtar, “Shtegu i Poezisë Fishtjane” bashkon kulturën e traditën në Lezhë
Gjatë një ceremonie të mbajtur në Lezhë në 154-vjetorin e lindjes së poetit kombëtar “At Gjergj Fishta” janë shpallur fituesit e edicionit të pestë të konkursit mbarë kombëtar me të njëjtin emër.
Lulzim Tafa në poezi, Ermal Hasimja në prozë dhe Milena Selimi në përkthim janë fituesit e çmimeve letrare “At Gjergj Fishta” për vitin 2025.
Librat e 80 autorëve pjesëmarrës janë vlerësuar nga një juri e përbërë nga shkrimtarët Rudolf Marku, Erenestina Halili dhe Bajram Kosumi.
Në fjalët përshëndetëse u theksua rëndësia e këtij çmimi si një prej më prestigjiozëve në letërsinë shqipe, që mban emrin e figurës më përfaqësuese të kombit.
“Lezha është kthyer në epiqendrën e letërsisë shqiptare ku emri i At Gjergj Fishtës i bën nder këtij konkursi dhe këtij qyteti”, u shpreh Kryetari i Bashkisë, Pjerin Ndreu.
“Konkursi letrar me emrin e nderuar të At Gjergj Fishtës, ka filluar të bëhet pjesë e një tradite letrare”, tha Rudolf Marku.
Fituesit e konsideruan këtë vlerësim si nxitje për të vijuar krijimtarinë e tyre letrare.
“Është nder dhe privilegj që të marr këtë çmim dhe këtë emër, faleminderit jurisë”, tha Milena Selimi.
“Poezinë gjithmonë e kam konsideruar ecje”, tha Lulzim Tafa.
“Kjo është një ndër herët që kam ndjerë më tepër emocione”, tha Edmond Hasimja.
Në të njëjtin kuadër, në Fishtë u zhvillua itinerari “Shtegu i Poezisë Fishtjane”, një udhëtim që ndërthur fjalën e Fishtës me mikpritjen dhe traditën lokale.
Përmes 12 stacioneve, vizitorët shkelën në vendlindjen e poetit, lexuan 100 thënie të tij dhe shijuan gastronominë e zonës.
Falë bashkëpunimit mes komunitetit, bizneseve dhe institucioneve, Tetori Fishtjan po kthehet në një traditë të re që bashkon kulturën, trashëgiminë dhe turizmin në Lezhë.
Gazetar: M. Marashi
/rtsh.al/