Kreu dënimin me burg, lirohet pas 17 muajsh ish-kryebashkiaku i Himarës, Jorgo Goro

Lirohet nga qelia ish-kryebashkiaku i Himarës, Jorgo Goro.

Ish-kryebashkiaku u arrestua më 23 mars 2024 me urdhër të SPAK-ut dhe u dënua me gjykim të shkurtuar 2 vite e 20 ditë burg për shpërdorim detyre në dy raste, dhe për fshehje të pasurisë. Kur vendimi u bë i formës së prerë më 22 korrik 2025, Goroja e kishte kryer tashmë pothuajse gjithë kohën e burgut. Raportohet se ish-kryebashkiaku i la ambientet e burgut më 12 gusht.

Prokuroria e Posaçme kundër Korrupsionit dhe Krimit të Organizuar ka dërguar një dosje të dytë ndaj Goros në GJKKO, nisur nga kallëzimi i ish-kryebashkiakut të zgjedhur të Himarës, Fredi Beleri, i cili akuzoi se në vitin 2016, Goroja kishte kaluar në mënyrë të paligjshme 4.263 m² tokë në emër të Arqile Bollanos, i komanduar në atë kohë në krye të bashkisë. Bollano, sipas Prokurorisë, kishte përfituar më herët edhe 7.700 m² tokë bazuar në ligjin 7501, duke e tejkaluar sipërfaqen që i takonte.

Për këtë dosje, Gjykata e Shkallës së Parë ka vlerësuar që ish-kryebashkiaku Goro të dënohet me 1 vit e 6 muaj burg.

/rtsh.al/