Kriza në Lindjen e Mesme, katër fuqi rajonale mblidhen në Islamabad për të shmangur përshkallëzimin e konfliktit

Në një përpjekje diplomatike për të adresuar tensionet në rritje dhe rrezikun e një lufte të gjerë në Lindjen e Mesme, kryeqyteti i Pakistanit, Islamabadi, priti këtë javë një takim të nivelit të lartë mes shefave të diplomacisë së katër prej shteteve më me ndikim në botën islame.

Në fokus të bisedimeve urgjente ishte përshkallëzimi i fundit i sulmeve ushtarake mes koalicionit Shtetet e Bashkuara-Izrael nga njëra anë, dhe Iranit nga ana tjetër, një situatë që kërcënon të destabilizojë të gjithë rajonin.

Pjesëmarrja në nivel të lartë

Takimi mblodhi së bashku figura kyçe të gjeopolitikës rajonale për të bashkërenduar qëndrimet e tyre përballë kësaj krize. Si mikpritës i këtij samiti shërbeu Zëvendëskryeministri dhe Ministri i Jashtëm i Pakistanit, Muhamad Ishaq Dar.

Në tryezën e diskutimeve morën pjesë gjithashtu Ministri i Jashtëm i Arabisë Saudite, Faisal bin Farhan Al Saud, Ministri i Jashtëm i Turqisë, Hakan Fidan, si dhe Ministri i Punëve të Jashtme dhe Emigracionit i Egjiptit, Badir Abdulati.

Synimi i bisedimeve, parandalimi i një lufte të hapur

Takimi i këtyre katër fuqive (Pakistani, Egjipti, Turqia dhe Arabia Saudite) vjen në një moment kritik, ndërkohë që përplasjet e armatosura dhe retorika e ashpër mes Tel Avivit, Uashingtonit dhe Teheranit kanë arritur pika kritike. Këto shtete, të cilat luajnë një rol strategjik ekuilibrues, po kërkojnë të koordinojnë një përgjigje të përbashkët diplomatike për të shmangur tërheqjen e shteteve të tjera fqinje në një konflikt të drejtpërdrejtë.

Burimet nga takimi theksojnë se theksi u vu te domosdoshmëria për një armëpushim të menjëhershëm, respektimi i sovranitetit të shteteve në rajon dhe gjetja e rrugëve diplomatike për të ulur tensionet ushtarake para se ato të kthehen në një krizë me pasoja të pakthyeshme globale.

/rtsh.al/