Kumbaro: 329 oficerë sigurie çdo ditë në shkolla, 1183 psikologë dhe punonjës socialë

TIRANË, 12 shkurt /ATSH/ Ministrja e Arsimit Mirela Kumbaro gjatë interpelancës së sotme në Kuvend të kërkuar mbi dhunën në shkolla, prezantoi planin e masave institucionale për të garantuar sigurinë në shkolla, mbështetjen psikologjike dhe këshillimin e karrierës për mbi 355 mijë nxënësit e sistemit parauniversitar duke theksuar rëndësinë e të trajtuarit të sfidave duke marrë pjesë të gjithë aktorët e shoqërisë që nga familja, tek institucionet.

“Po flasim për një sfidë globale që, në forma të ndryshme, po përjetohet nga të gjitha shoqëritë, dhe që lidhet drejtpërdrejt me dinamikat që shoqërojnë ndryshimin e botës ku rriten fëmijët tanë: E kam fjalën për hapjen pa limit të botës virtuale që thyen gjithë kodet e komunikimit dhe zhbën konvencionet etike të shoqërive mbi të cilat ngrihen dhe rregullat e sjelljes në shoqëri. Dhe patjetër është një sfidë globale. Por është një sfidë që, në Republikën e Shqipërisë do të duhet ta trajtojmë të gjithë ne bashkë: aktorët socialë, politikë, ekonomikë, mediatikë, nga familja e deri te shteti – si një kauzë për bashkim forcash, dhe jo si sebepin e radhës për politikën e çastit”, tha Kumbaro.

Ministrja e Arsimit u shpreh se sot janë 355.510 fëmijë në sistemin parauniversitar nga klasa e parë deri në të dymbëdhjetën dhe mbi 30 mijë mësues që punojnë në të 1498 shkollat e sistemit parauniversitar.

“Janë po ashtu 2670 mësues ndihmës që japin sot kontributin e tyre në të gjithë këtë rrjet për të siguruar gjithëpërfshirjen e fëmijëve me aftësi të veçanta brenda të njëjtit sistem, ku numri i fëmijëve me aftësi ndryshe për vitin 2025-2026 është rritur me 6,8% për një total prej 6073 fëmijë, përkundër rritjes së numrit të mësuesve ndihmës me 8%”, vijoi ajo.

“Mbi 686 koordinatorë cilësie dhe koordinatore të karrierës të trajnuar profesionalisht si të tillë, punojnë në shkollat tona për të rritur cilësinë e mësimdhënies dhe për të shoqëruar nxënësit në arsimin bazë dhe në atë të mesëm, në zgjedhjet dhe vendimmarrjet e tyre për jetën. 329 oficerë sigurie janë të pranishëm çdo ditë në shkollat me numër të madh nxënësish, dhe vijon procesi i trajnimit të kandidatëve të tjerë pranë Akademisë së Sigurisë, ndërkohë që është 392 numri i miratuar për oficerë sigurie dhe i garantuar me fond page, për çka vijojnë thirrjet periodike në mënyrë të rregullt. 1183 psikologë dhe punonjës socialë janë aktivë në shkollat publike dhe jopublike të Republikës së Shqipërisë”, tha Kumbaro.

Ministrja Kumbaro tha se këto të dhëna nuk duhet të mohohen me lehtësinë e padurueshme të kohës së papërfillshme televizive që zë kjo lloj politike.

“Punën që bëhet çdo ditë nga mijëra e mijëra punonjës të arsimit, për të çuar përpara dhe për të përmirësuar po ashtu ditë pas dite cilësinë e arsimit kombëtar, rolin e shkollës, dhe krijimin e modeleve të mira, përkundër fenomeneve negative bashkëshoqëruese që janë po aq të lashta sa njerëzimi dhe po aq moderne e të komplikuara sa koha që po jetojmë. Dhe është gjithaq e shëmtuar të stigmatizosh një kategori të tërë punonjësish të përkushtuar, mësuesit, dinjitetin e të cilëve duhet ta mbrojmë të gjithë si pasuri kombëtare”, tha Kumbaro.

/e.i/j.p/r.e/