Lidershipi i grave si shtyllë e shtetndërtimit, mesazhi i Presidentes Osmani në Ditën Ndërkombëtare të Gruas
Në shënim të Ditës Ndërkombëtare të Gruas, Presidentja e Republikës së Kosovës, Vjosa Osmani, përcolli një mesazh mbi rolin thelbësor të grave në proceset e shtetndërtimit, paqes dhe sigurisë globale. Përmes një adresimi publik, e para e shtetit theksoi se historia e Kosovës është një provë e gjallë e faktit se liria dhe institucionet demokratike nuk mund të ngrihen pa pjesëmarrjen e barabartë të grave.
Duke e vënë theksin te trashëgimia historike e vendit, Presidentja Osmani rikujtoi se rruga e Kosovës drejt pavarësisë u shtrua nga përpjekjet e përbashkëta.
“Rruga jonë drejt lirisë dhe shtetësisë nuk u shkrua vetëm nga burrat. Ajo u formua nga gratë dhe burrat që qëndruan krah për krah,” u shpreh Osmani, duke vlerësuar gratë që udhëhoqën rezistencën paqësore, ato që duruan peshën e luftës, si dhe ato që u kthyen në forcën morale për rindërtimin e institucioneve në periudhën e pasluftës. Ajo i cilësoi këto gra si “busulla morale” e shtetit të Kosovës.
Kusht i panegociueshëm për sigurinë dhe demokracinë
Një pjesë qendrore e artikulimit të saj u fokusua te proceset bashkëkohore të sigurisë. Fituesja e Çmimit 2025 “Women for Peace and Security” (Gratë për Paqe dhe Siguri) nga Asambleja Parlamentare e NATO-s, paralajmëroi se çdo proces paqësor apo sistem sigurie që përjashton zërat e grave është i destinuar të jetë i paqëndrueshëm dhe i paplotë.
Sipas Presidentes, gratë nuk duhet të trajtohen më si vëzhguese të progresit shoqëror, por si drejtuese të tij në çdo sferë—nga jeta politike dhe diplomacia, tek ekonomia dhe forcat e sigurisë.
Një thirrje globale kundër status quo-së
Përtej kontekstit lokal, Osmani ngriti shqetësimin mbi realitetin e vështirë me të cilin përballen ende miliona gra në mbarë botën, të cilat i nënshtrohen dhunës, margjinalizimit dhe padrejtësive. Ajo e cilësoi avancimin e të drejtave të grave jo thjesht si një çështje drejtësie, por si një element jetik për shëndetin e vetë demokracive dhe mbrojtjen e dinjitetit njerëzor.
“Zërat e grave nuk duhet kurrë të heshtin ose injorohen. Lidershipi i tyre nuk duhet trajtuar si opsional dhe pabarazia nuk duhet pranuar si status quo,” theksoi Osmani në përmbyllje të mesazhit të saj. “Kur barazia është reale, paqja bëhet më e qëndrueshme.”
/rtsh.al/