Liqeni në Fushë-Studën në Librazhd, i veshur me petkun e dëborës

TIRANË, 5 dhjetor/ATSH/ Liqeni i Fushë-Studënit në Librazhd është një prej destinacioneve turistike më mbresëlënës të vendit.

Liqeni i Fushë-Studënit, i mbuluar nga dëbora këtë javë të parë të dhjetorit, ofron një pamje piktoreske për të pasionuarit pas natyrës.

Kryeministri Edi Rama ndau në rrjetet sociale pamje nga liqeni i Fushë-Studënit në Librazhd, i veshur me petkun e dëborës.

Panorama e Fushë-Studënit, në Parkun Kombëtar të Shebenikut, mbetet një prej atraksioneve më të rëndësishme si për nga biodiversiteti, po aq edhe si një destinacion ekoturistik gjatë gjithë vitit.

Liqeni i Fushë-Studënit është në një prej vendeve më të frekuentuara, nga turistët vendas, por edhe të huaj sa i përket turizmit malor. Ky destinacion kthehet në një “tablo” piktoreske sidomos gjatë sezonit të dimrit, që i ofron të gjitha: ajrin e pastër, ujin dhe natyrën e bukur.

Fotot e liqenit të Fushë-Studënit vijnë përmes objektivit të Nino Mejdanit, pjesëmarrës në Konkursin Ndërkombëtar të Foto e Video Reels “Wanderlust in Albania 2”.

/e.i/j.p/r.e/