Macron bisedë telefonike me presidentin e Iranit: Teherani nuk do të ketë kurrë armë bërthamore
Presidenti i Francës, Emmanuel Macron pati një bisedë telefonike ditën esotme me presidentit e Iranit, Masoud Pezeshkian.
Gjatë bisedës mes dy presidentëve, Macron i bëri të qartë homologut të tij iranian se Irani “nuk duhet të zotërojë kurrë armë bërthamore”.
Në një mesazh në X, Macron tha se Franca dhe partnerët e saj evropianë do të “përshpejtojnë negociatat” mbi çështjen bërthamore me Teheranin, me qëllim “daljen nga lufta dhe shmangien e rreziqeve më serioze”. Biseda u zhvillua në ditën e nëntë të konfliktit midis Iranit dhe Izraelit.
“Jam i bindur se ka një rrugëdalje nga lufta. Për ta arritur këtë, ne do të përshpejtojmë negociatat e nisura me Iranin”, theksoi presidenti i Elizesë.
Macron bëri thirrje gjithashtu për lirimin e Cécile Kohler dhe Jacques Paris, dy shtetasve francezë të ndaluar në Iran që nga maji i vitit 2022 me akuza për spiunazh.
“E përsërita kërkesën time: Cécile Kohler dhe Jacques Paris duhet të lirohen. Paraburgimi i tyre çnjerëzor është i padrejtë. Pres kthimin e tyre në Francë”, shkroi presidenti.
Ndërkohë, Izraeli tha të shtunën se kishte goditur një central bërthamor në Isfahan dhe kishte vrarë tre komandantë të Gardës Revolucionare Iraniane.