Marilyn Monroe dhe “Happy Birthday” që hyri në histori më 19 maj 1962

TIRANË, 19 maj /ATSH/ Më 19 maj 1962, në një nga momentet më të paharrueshms të kulturës amerikane të shekullit XX, Marilyn Monroe interpretoi këngën “Happy Birthday, Mr. President” për John F. Kennedy në Madison Square Garden në New York.

Performanca, që zgjati pak më shumë se një minutë, u kthye menjëherë në një prej momenteve historike për mënyrën si do të ndërthurej politika, spektakli dhe kultura pop në Amerikën e viteve ’60.

Me zërin e saj pëshpëritës dhe fustanin ngjyrë nude të mbuluar me kristale, Monroe krijoi një nga skenat më të famshme të historisë televizive dhe artistike amerikane.

Në atë performancë kishte shumë më tepër se një ditëlindje.
Ishte Amerika e fillimviteve ’60: televizioni që po e kthente politikën në spektakël, Hollywood-i që përzihej me pushtetin, presidentët që shndërroheshin në ikona pop.

Marrëdhënia e saj me Kennedy-n mbeti për vite me radhë objekt spekulimesh, duke e bërë atë interpretim edhe më të komentuar nga media dhe publiku.

Vetëm pak muaj më vonë, Marilyn Monroe do të ndahej nga jeta, ndërsa performanca e 19 majit 1962 mbeti simbol i përhershëm i mitit të saj, e brishtë, magnetike, e pavdekshme dhe i një epoke ku politika po shndërrohej gjithnjë e më shumë në një spektakël publik.