Mbi 300 viktima në Liban, përshkallëzohet përplasja Izrael–Hezbollah
Luftime të reja janë shënuar gjatë natës mes Izraelit dhe Hezbollahut, duke thelluar krizën e sigurisë në Lindjen e Mesme. Ushtria izraelite ka ndërmarrë sulme ajrore në territorin e Libanit, ndërsa grupi i armatosur Hezbollah është kundërpërgjigjur me lëshime raketash drejt disa zonave në Izrael, duke aktivizuar sirenat e alarmit në Tel Aviv dhe qytete të tjera.
Sipas burimeve zyrtare izraelite, objektiv i sulmeve kanë qenë raketahedhës të Hezbollahut në jug të Libanit. Nga ana tjetër, Hezbollahu, i mbështetur nga Irani, ka deklaruar se ka goditur disa objektiva brenda territorit izraelit, në një kundërpërgjigje që sinjalizon rrezikun e një përshkallëzimi më të gjerë.
Zhvillimet e fundit vijnë në një moment delikat diplomatik, ndërsa statusi i Libanit në kuadër të një armëpushimi të brishtë me Iranin mbetet i paqartë. Çështja pritet të jetë në qendër të bisedimeve të paqes që janë planifikuar të zhvillohen këtë fundjavë në Pakistan.
Në sfondin e tensioneve, presidenti i SHBA-së, Donald Trump, është cituar të ketë kërkuar një qasje më të përmbajtur nga Izraeli në Liban. Deklaratat e tij interpretohen gjerësisht si një mesazh i drejtpërdrejtë për kryeministrin izraelit, Benjamin Netanyahu, për të shmangur një përshkallëzim të mëtejshëm të konfliktit.
Ndërkohë, bilanci i viktimave vijon të rritet. Sipas Ministrisë së Shëndetësisë së Libanit, sulmet ajrore izraelite të së mërkurës kanë shkaktuar mbi 300 viktima.
Nga Teherani, reagimi ka qenë i ashpër. Në një deklaratë të transmetuar nga televizioni shtetëror iranian, lideri suprem Mojtaba Khamenei ka paralajmëruar se Irani “ruan të drejtën për hakmarrje” ndaj sulmeve amerikano-izraelite. Ai nënkuptoi gjithashtu mbështetjen për aleatët rajonalë, përfshirë Hezbollahun në Liban, një aktor që SHBA dhe Izraeli këmbëngulin se nuk përfshihet në marrëveshjet ekzistuese të armëpushimit.
Analistët paralajmërojnë se situata mbetet tejet e paqëndrueshme, me rrezik real për përshkallëzim të mëtejshëm nëse përpjekjet diplomatike nuk arrijnë të ulin tensionet në ditët në vijim.
/rtsh.al/