Mbyllet raundi i 27-të i Superligës, Partizani fiton derbin ndaj Dinamos, Egnatia përmbys Teutën

TIRANË, 10 mars/ATSH/ Raundi i 27-të i Superligës shqiptare të futbollit u mbyll mbrëmjen e së hënës me dy ndeshjet e fundit të javës, ku Partizani fitoi derbin ndaj Dinamos, ndërsa Egnatia triumfoi me përmbysje ndaj Teutës në Rrogozhinë.

Në stadiumin “Air Albania”, Partizani mposhti Dinamon me rezultatin 0-2, duke siguruar një fitore të rëndësishme në garën për zonën “Final 4”. Të kuqtë kaluan në avantazh në minutën e 38-të me golin e Carlos Martinez, ndërsa në pjesën e dytë Arafat Doumbia dyfishoi shifrat në minutën e 51-të, duke vulosur fitoren e skuadrës së tij. Me këtë sukses, Partizani regjistron pesë fitore radhazi dhe ngjitet përkohësisht në vendin e katërt në renditje.

Ndërkohë në Rrogozhinë, Egnatia fitoi 4-2 përballë Teutës pas një ndeshjeje me shumë gola. Skuadra nga Durrësi kaloi e para në avantazh në minutën e 26-të me Vasilis Zogos, por vendasit reaguan shpejt duke përmbysur rezultatin brenda pjesës së parë me golat e Alessandro Albanese dhe Daniel Adjessa. Në pjesën e dytë, Teuta barazoi me penalltinë e realizuar nga Xhoele Macolli, por në minutat e fundit Egnatia shënoi dy herë të tjera me Nikola Buric dhe Fernando Medeiros, duke siguruar tre pikët.

Humbja e radhës për Teutën, e shtata këtë sezon, ka vënë në pikëpyetje pozitat e trajnerit Enkeleid Dobi.

Pas 27 javësh kampionat, renditjen e kryeson Vllaznia me 51 pikë. Pas saj ndjekin AF Elbasani, Egnatia dhe Partizani që për momentin mbajnë vendet që çojnë në “Final 4”. Vora, pas tre humbjeve radhazi, ka rënë në zonën play-out në vendin e tetë, ndërsa Flamurtari dhe Tirana vijojnë të mbeten në dy pozitat e fundit të klasifikimit.

Rezultatet e raundit të 27-të:

E diel, 8 mars
Bylis 1-0 Vora
Tirana 0-1 AF Elbasani
Flamurtari 1-0 Vllaznia

E hënë, 9 mars
Dinamo 0-2 Partizani
Egnatia 4-2 Teuta

/e.i/a.f/