Meidani: Duhet drejtësi për çlirimtarët, ky aktgjykim duhet të rrëzohet

PRISHTINË, 16 shtator/ATSH/ Ambasadori i Shqipërisë në Maqedoninë e Veriut, Denion Mejdani ka reaguar pas vendimit të Gjykatës Speciale në Hagë për dënimin në shkallë të parë të katër ish-krerëve të Ushtrisë Çlirimtare të Kosovës, Hashim Thaçi, Jakup Krasniqi, Kadri Veseli dhe Rexhep Selimi.

Përmes një postimi në Facebook, Mejdani ka shprehur qëndrimin e tij se vendimi nuk përbën fundin e procesit gjyqësor, duke theksuar se ndaj tij mund të bëhet apel.

“Shqiptarët e dinë mirë se liria nuk na u fal. U fitua me gjak. U mbrojt me sakrificë. U bë e mundur me guximin e UÇK-së dhe me ndërhyrjen vendimtare të NATO-s.

Prandaj, sot qëndrojmë me dinjitet pranë Hashim Thaçit, Kadri Veselit, Rexhep Selimit, Jakup Krasniqit dhe familjeve të tyre. Ky aktgjykim nuk është fjala e fundit. Është shkalla e parë. Ka apel. Dhe duhet drejtësi për çlirimtarët. Besoj fort në drejtësi dhe besoj se ky aktgjykim duhet të rrëzohet”, shkruan Meidani.

Reagimi i plotë i Denion Meidanit, ambasador i Shqipërisë në Maqedoninë e Veriut

Isha mbase tepër i ri kur Shqipëria, me babain tim, President të Republikës, hapi kufijtë dhe zemrën për refugjatët e Kosovës që iknin nga vrasjet, spastrimi dhe makina e terrorit të Millosheviçit.

Viti 1999 nuk është për mua vetëm histori. Është kujtesë.

Kujtesa e një Shqipërie, por edhe e një Maqedonie të Veriut, që u bënë strehë e mburojë për qindra mijëra shqiptarë të Kosovës.

Kujtesa e një populli që luftonte për të mbijetuar, për të qenë i lirë, për të mos u zhdukur nga toka e vet.

Kujtesa e një kohe kur bota demokratike vendosi të mos qëndronte spektatore.

Njëzet e shtatë vjet më vonë, katër prej atyre guximtarëve që udhëhoqën Ushtrinë Çlirimtare të Kosovës u dënuan sot në shkallë të parë.

Për mua, drejtësia nuk është dhënë.

Sot, si Ambasador i Shqipërisë në Shkup, kjo peshë ndihet edhe më trishtueshëm, mes një komuniteti shqiptar që këtë luftë nuk e ka mësuar në libra. Bijtë e tij e kanë luftuar. Familjet e tij kanë sakrifikuar. Ky komunitet e njeh mirë çmimin e lirisë, sepse e ka paguar vetë.

Shqiptarët e dinë mirë se liria nuk na u fal. U fitua me gjak. U mbrojt me sakrificë. U bë e mundur me guximin e UÇK-së dhe me ndërhyrjen vendimtare të NATO-s.

Prandaj, sot qëndrojmë me dinjitet pranë Hashim Thaçit, Kadri Veselit, Rexhep Selimit, Jakup Krasniqit dhe familjeve të tyre.

Ky aktgjykim nuk është fjala e fundit. Është shkalla e parë. Ka apel. Dhe duhet drejtësi për çlirimtarët. Besoj fort në drejtësi dhe besoj se ky aktgjykim duhet të rrëzohet.

Sepse historia jonë mbase mund të gjykohet. Por kurrë nuk mund të rishkruhet.

/a.f/r.e/