Mësuesit në provimin e licenses, testohen në 20 profile, mes tyre edhe arsimi special

Prej datës 15 korrik, mësuesit që synojnë të pajisen me licencën profesionale por edhe mësues për rikualifikim dhe rinovim të licencës, janë futur në testimin e organizuar nga QSHA.

Provimet do të zgjasin deri më 15 gusht 2025, dhe zhvillohen çdo ditë në bazë të profilit mësimor.

Këtë të premte ishte radha e kandidatëve për arsimin special, një nga fushat më delikate të sistemit arsimor.

“Ka vështirësitë e veta por edhe kënaqësitë e veta se ndihmon dikë që vërtet ka nevojë. Jetoj këtu në Tiranë dhe punoj prej një viti, kisha një shkëputje prej disa vitesh që kam mbaruar studimet, por e kam parë të arsyeshme që është rritur kërkesa për mësues ndihmës”.

“Tre herë sepse kam ruajtur pikët e herëve te tjera. Meqënëse kemi bërë edhe kualifikimin pak a shumë të njëjtat pyetje, te fusha jonë”.

“Ka vështirësitë e veta për pjesën e strukturës, mjeteve, infrastrukturës, pastaj puna me këta femijë duhet të ketë durim dhe vullnet dhe është shume e bukur”.

Në total janë të paktën 20 profile mësimore që do të testohen, përfshirë arsimin fillor, atë parashkollor, lëndët e shkencave natyrore, gjuhët, edukimin fizik dhe muzikën.