Michael Caine: Pa gruan time do të kisha vdekur shumë kohë më parë

LONDER, 14 mars, ATSH/ Aktori legjendar britanik Michael Caine, i cili feston sot  93-vjetorin, ka treguar se bashkëshortja e tij Shakira Caine ka pasur një rol vendimtar në jetën e tij, duke e ndihmuar të largohej nga një periudhë e vështirë e abuzimit me alkoolin.

Fituesi i dy çmimeve Academy Awards, ka rrëfyer në intervista se pinte çdo ditë sasi të mëdha alkooli. “Isha një ‘piss artist’. Pija një shishe vodka në ditë. Ka shumë gjasa që do ta kisha pirë veten deri në vdekje,” është shprehur aktori, duke shtuar se jeta e tij ndryshoi plotësisht pasi e takoi atë.

Historia e tyre e dashurisë nisi në mënyrë të pazakontë në fillim të viteve ’70. Caine e pa për herë të parë Shakirën në një reklamë televizive për kafen Maxwell House dhe mbeti i mahnitur nga bukuria e saj. Ai kërkoi ta gjente dhe, pas disa përpjekjesh, arriti ta kontaktonte. Takimi i tyre i parë çoi shpejt në një lidhje serioze.

Çifti u martua në vitin 1973 dhe që atëherë kanë ndërtuar një nga marrëdhëniet më të qëndrueshme në botën e kinemasë. Sipas Caine, Shakira solli stabilitet dhe qetësi në jetën e tij, duke e ndihmuar të largohej nga zakonet e dëmshme dhe të përqendrohej tek familja dhe karriera.

Gjatë karrierës së tij mbi gjashtë dekada, Michael Caine është bërë një nga aktorët më të njohur britanikë në Hollywood, duke luajtur në më shumë se 130 filma. Ai ka fituar dy Academy Awards për rolet në filmat “Hannah and Her Sisters” dhe “The Cider House Rules”, ndërsa është nominuar edhe katër herë të tjera.

Në vitin 2000 u nderua me titullin “Sir” nga Elizabeth II për kontributin e tij në kinematografi.

Aktori ka njoftuar së fundmi tërheqjen nga aktrimi pas filmit “The Great Escaper”,  duke i dhënë fund një prej karrierave më të gjata dhe më të suksesshme në historinë e kinemasë britanike.