Ministria e Shëndetësisë: Tre fëmijët në Durrës nën kujdes mjekësor dhe social

Pas sinjalizimit të bërë nga media gjatë ditës së sotme lidhur me braktisjen e mundshme të tre fëmijëve nga nëna e tyre, Ministria e Shëndetësisë dhe Mbrojtjes Sociale ka reaguar menjëherë përmes strukturave përgjegjëse.

Shërbimi Social Shtetëror, në bashkëpunim me Policinë e Shtetit, ka marrë deklaratat përkatëse nga nëna, fëmijët dhe gjyshja e tyre, me qëllim sqarimin e plotë të rrethanave të rastit dhe garantimin e sigurisë së të miturve.

Fëmijët janë dërguar në Spitalin Rajonal të Durrësit, ku po qëndrojnë nën kujdesin e stafit mjekësor, të shoqëruar edhe nga nëna. Ata janë pajisur me ushqimin dhe veshmbathjen e nevojshme, ndërsa gjendja e tyre shëndetësore po monitorohet.

Ministria bën me dije se në vijim do të mblidhet Grupi Teknik Ndërsektorial, i cili do të shqyrtojë rastin dhe do të vendosë masat e mëtejshme për mbrojtjen dhe mirëqenien e fëmijëve, në përputhje me legjislacionin në fuqi.

/rtsh.al/