Moody’s rishikon me rritje ekonominë shqiptare, Malaj: Ndikim ulja e borxhit, rritja e investimeve

TIRANË, 19 tetor /ATSH/ Agjencia prestigjioze Ndërkombëtare e Vlerësimit Moody’s, rishikoi me rritje ekonominë shqiptare, duke e konsideruar në Ba3- e qëndrueshme, nga B1-pozitive. Ministri i Financave Petrit Malaj konfirmoi këtë rritje të vlerësimit duke e cilësuar lajm të mirë për ekonominë shqiptare dhe reflektim të të gjitha përpjekjeve për të siguruar një rritje të qëndrueshme të ekonomisë, forcimin e mëtjeshëm të financave publike, si dhe një efikasitet më të lartë në zbatim të reformave drejt integrimit europian. Në një deklaratë për mediet, Malaj tha se, rishikimi pozitiv për ekonominë shqiptare vjen në një moment kur ekonomia globale po kalon një sërë sfidash gjeopolitike, digjitalizimi apo kushtet klimaterike. Sipas tij, ky vlerësim pozitiv konfirmon mbi të gjitha se Shqipëria është duke ecur në rrugën e duhur, sa i takon reformave në kuadër të integrimit, garantimit të mirëqeverisjes si dhe forcimit të mëtejshëm të financave publike. “Përfitimet që vijnë nga ky vlerësim janë konkrete: Rritja do të sjellë vlerësim pozitiv sa i takon investimeve të huaja duke rritur besimin tek investitorët e huaj. Gjithashtu Shqipëria do të përfitojë nga tregjet ndërkombëtare duke siguruar huamarrje me kosto më ulët financimi”, u shpreh ministri. Malaj tha se, “kjo do të thotë që ekonomia shqiptare do të jetë e qëndrueshme edhe në termat afatmesëm”. Duke u ndalur në treguesit ekonomikë në rritje, ministri tha se, në harkun kohor të 10 viteve PBB është rritur më shumë se dy herë, nga 9,6 miliardë euro në 2013 në 21.4 miliardë euro deri në fund të 2024.

Ministri u ndal në treguesit ekonomikë.

“Gjithashtu të ardhurat për frymë janë rritur nga 3 300 euro që shënonin në 2013 në 10 380 euro që pritet të jenë në fund të 2024. E ndërsa PBB në vendet e rajonit u rrit me 53% gjatë 10 vjeçarit të fundit, në Shqipëri ajo është rritur me 80 %”, u shpreh Malaj.

Nga ana tjetër, sipas tij, papunësia shënoi nivelin më të ulët historik. “Nga 16% që ishte në 2013 arriti në 10.7% në fund të 2023. Ky nivel është ndjeshëm më i ulët me vendet e rajonit ku shkalla e papunësisë u regjistrua në 12.4%”, vijoi ministri i Financave.

Ndërsa sa i takon inflacionit mesatar gjatë periudhës 1014-2023 Shqipëria rezultoi në nivelin 2.5% ndërsa në rajon kjo shifër u llogarit në nivelin 3%.

Investimet e huaja direkte në ekonomi në Shqipëri kanë qenë  8% e PBB, gjatë periudhës 2013- 2023, konsiderueshëm më të larta se vendet e rajonit që shënonte 6.1%.

Gjithashtu edhe borxhi publik gjatë 10-vjeçarit të fundit ka njohur rënie të qenësishme, pavarësisht tre krizave të rënda siç ishin tërmeti, pandemia apo ajo energjetike.

“Borxhi publik është reduktuar me mbi 14%. Nga 70.4 % PBB që shënonte në 2014, ky tregues është ulur në 56.3% që pritet të jetë në fund të 2024”, tha Malaj.

Në një kohë kur borxhi publik në vendet e rajonit është rritur mesatarisht me 9% gjatë 10 viteve të fundit, Shqipëria, theksoi ai, mundësoi një ulje me rreth 14 pikë përqindje.

Ministri theksoi se, treguesit pozitivë të ekonomisë shqiptare janë vlerësuar edhe nga institucionet e tjera ndërkombëtare, çka tregon për rrugën e duhur të financave publike dhe reformave.