Ndryshon ligji për Shoqërinë Civile, punonjësit e AMSHC kalojnë në shërbimin civil, rregulla të reja për grantet

Këshilli i Ministrave ka miratuar dhe depozituar në Kuvendin e Republikës së Shqipërisë një projektligj që synon amendimin e ligjit “Për organizimin dhe funksionimin e Agjencisë për Mbështetjen e Shoqërisë Civile” (AMSHC). Ndryshimet strukturore rikonfigurojnë raportet e agjencisë me pushtetin ekzekutiv, ndryshojnë statusin e marrëdhënieve të punës për administratën e saj, si dhe vendosin një mekanizëm të ri për kontrollin dhe ankimimin e granteve.

Sipas vendimit të propozuar nga Ministria e Shëndetësisë dhe Mirëqenies Sociale, kompetencat mbikëqyrëse dhe filtri institucional për agjencinë do të kalojnë përmes dikasterit që mbulon politikat sociale.

Riorganizimi i bordit dhe vartësia institucionale

Në draftin e ri, theksohet se statuti i AMSHC-së do të vijojë të miratohet nga Këshilli i Ministrave, por propozimet e bordit do të përcillen ekskluzivisht “nëpërmjet ministrit përgjegjës për mirëqenien sociale”. Ky centralizim i komunikimit reflektohet edhe në mënyrën e zgjedhjesë së anëtarëve të bordit.

Projektligji saktëson procedurën e re për aplikimet nga sektori jo-fitimprurës:

“Organizatat e shoqërisë civile, të regjistruara sipas ligjit, kanë të drejtë t’i dërgojnë propozimet për përfaqësim në bordin mbikëqyrës pranë ministrit përgjegjës për mirëqenien sociale.”

Po ashtu, anëtarët e bordit që përfaqësojnë institucionet shtetërore do të propozohen në qeveri nga i njëjti ministër, duke unifikuar kështu linjën e raportimit.

Statusi i punonjësve dhe niveli i pagave

Një tjetër ndërhyrje thelbësore e këtij projektligji është shkëputja e personelit të AMSHC-së nga rregullat e mëparshme dhe integrimi i tyre nën ombrellën e ligjit për nëpunësin civil. Punësimi për këto pozicione nuk do të jetë më kompetencë ekskluzive e drejtuesve të agjencisë, por do të ushtrohet nga autoritetet përgjegjëse të administratës publike.

Për sa i përket trajtimit financiar dhe marrëdhënieve juridike të punës, dokumenti përcakton qartë ndarjen e kategorive:

“Nivelet e pagave dhe të shpërblimit të punonjësve të AMSHC-së, si dhe të kryetarit e anëtarëve të bordit mbikëqyrës miratohen nga Këshilli i Ministrave, në përputhje me legjislacionin e posaçëm në fuqi. Marrëdhëniet e punës së punonjësve të AMSHC-së rregullohen sipas parashikimeve të legjislacionit për nëpunësin civil. Marrëdhëniet e punës për punonjësit administrativë rregullohen sipas dispozitave të Kodit të Punës.”

Miratimi i granteve dhe e drejta e ankimimit

Për të rritur sigurinë juridike të organizatave aplikuese për fonde, projektligji i shton Bordit Mbikëqyrës në mënyrë eksplicite kompetencën për të miratuar dhënien e granteve. Për herë të parë, organizatat do të kenë një rrugë të përcaktuar qartë ligjore për të kundërshtuar vendimet negative për financim.

Sipas nenit 8 të projektligjit, i cili shton një paragraf të ri në ligjin bazë, garantohet e drejta e rishikimit administrativ të fondeve të refuzuara:

“Vendimi i bordit mbikëqyrës për miratimin e dhënies së grantit ankimohet në përputhje me parashikimet e neneve 130 e vijues të Kodit të Procedurave Administrative.”

Ndryshimet e propozuara pritet të diskutohen në komisionet parlamentare dhe do të hyjnë në fuqi 15 ditë pas botimit në Fletoren Zyrtare.

/rtsh.al/