Nën hetim për pastrim parash, Gjykata e Tiranë rrëzon vendimin për sekuestrimin e pasurive të Elman Abules dhe Kristiano Boçit
Gjykata e Tiranës ka rrëzuar vendimin për sekuestrimin e pasurive dhe shoqërive të personave nën hetim, Elman Abule, Kristian Boçi dhe gruaja e tij, Drilona Boçi. Kjo ka ardhur pas një procesi ligjor ku, pas ankimit të bërë nga të hetuarit, Gjykata e Apelit Tiranë shqyrtoi çështjen dhe vendosi prishjen e vendimit të Gjykatës së Shkallës së Parë, duke e kthyer çështjen për rigjykim nga një trup gjykues tjetër.
Në përputhje me vendimin e Apelit, kërkesa për vendosjen e sekuestros ndaj pasurive të këtyre personave i është caktuar për rigjykim gjyqtarit Altin Abdiu. Ky i fundit, pas shqyrtimit të kërkesës, ka vendosur rrëzimin e kërkesës së Prokurorisë për sekuestrimin e pasurive. Ky vendim, i cili u mor më 17 tetor 2025, ka marrë formë të prerë pasi nuk është ankimuar nga prokurorja e çështjes.
Sipas hetimeve të zhvilluara nga Prokuroria e Tiranës, më herët ishin sekuestruar 14 shoqëri tregtare, dyqane, apartamente dhe vila me vlerë rreth 50 milionë euro, pasuri që zotëroheshin nga Elman Abule, Kristian Boçi, Drilona Boçi dhe 4 persona të tjerë të lidhur me ta. Hetimet e prokurorisë dyshojnë se këta persona janë përfshirë në një skemë të pastrimit të parave, ndërsa Elman Abule ka një dënim të mëparshëm për trafik narkotikësh nga gjykatat belge.
/rtsh.al/