Netanyahu pranon ‘gabimin tragjik’ pas sulmit në Rafah
Kryeministri izraelit Benjamin Netanyahu pranoi të hënën se një “gabim tragjik” ishte bërë pasi një sulm izraelit në qytetin jugor të Gazës, Rafah, i vuri zjarrin një kampi me tendë që strehonte palestinezë të zhvendosur. Sulmi vrau të paktën 45 njerëz, thanë zyrtarë lokalë.
Izraeli është përballur me kritika të shumta ndërkombëtare për luftën e tij me Hamasin, madje edhe nga disa aleatët e tij më të afërt, veçanërisht Shtetet e Bashkuara, që shprehin zemërim për vdekjet e civilëve. Izraeli këmbëngul se i përmbahet ligjit ndërkombëtar edhe pse përballet me shqyrtimin e gjykatave më të larta të botës, njëra prej të cilave javën e kaluar kërkoi që të ndalonte ofensivën në Rafah.
Ushtria izraelite kishte thënë më herët se kishte nisur një hetim për vdekjet e civilëve pasi goditi një instalim të Hamasit dhe vrau dy militantë të lartë. Sulmi i së dielës mbrëma, i cili dukej të ishte një nga më vdekjeprurësit e luftës, ndihmoi në rritjen e numrit të përgjithshëm të vdekjeve palestineze në luftë mbi 36,000, sipas Ministrisë së Shëndetësisë të Gazës, e cila nuk bën dallimin midis luftëtarëve dhe joluftëtarëve në raportin e saj.
“Megjithë përpjekjet tona maksimale për të mos dëmtuar civilët e pafajshëm, mbrëmë, ndodhi një gabim tragjik”, tha Netanyahu të hënën në një fjalim në parlamentin e Izraelit. “Ne po hetojmë incidentin dhe do të marrim një qëndrim sepse kjo është politika jonë.”
Mohammed Abuassa, i cili nxitoi në vendngjarje në lagjen veriperëndimore të Tel al-Sultan, tha se “njerëzit që ishin në një gjendje të padurueshme”.
“Ne nxorëm fëmijët që ishin copë-copë. Ne nxorëm të rinj dhe të moshuar. Zjarri në kamp ishte I tmerrshëm,” tha ai.
Të paktën 45 persona u vranë, sipas Ministrisë së Shëndetësisë së Gazës dhe shërbimit të shpëtimit të Gjysmëhënës së Kuqe Palestineze. Ministria tha se të vdekurit përfshinin të paktën 12 gra, tetë fëmijë dhe tre të rritur e të moshuar, me tre trupa të tjerë të djegur tërësisht. AP
/rtsh.al/