Nufi mikpret në Vlorë homologun belg Theo Francken

TIRANË, 18 gusht /ATSH/ Në një atmosferë të ngrohtë dhe miqësore, ministri i Mbrojtjes Ermal Nufi mikpriti sot në Vlorë homologun e tij belg, Theo Francken, i cili po viziton Shqipërinë së bashku me familjen.

“Një takim i ngrohtë për të ndarë disa momente larg angazhimeve zyrtare, si dhe një mundësi e mirë për të forcuar miqësinë dhe bashkëpunimin në kuadër të prioriteve të përbashkëta mes dy vendeve tona”, u shpreh ministri Nufi, përmes publikimit në rrjetet e tij sociale.

Ministri belg i Mbrojtjes, Theo Francken ka zgjedhur Shqipërinë për të kaluar pushimet verore, duke u ndalur edhe në qytetin e Beratit së bashku me familjen.

Gjatë qëndrimit në Berat, Francken është angazhuar edhe në aktivitete sportive, mes tyre padel, duke përfituar nga ditët e pushimit për të eksploruar vendin dhe për të kaluar kohë me familjarët.

Vizita e tij vjen në kulmin e sezonit turistik, ndërsa Shqipëria vijon të tërheqë edhe figura të njohura ndërkombëtare, të cilët zgjedhin vendin për pushime dhe përvoja larg angazhimeve zyrtare.

1 nga 2

/gj.m/j.p/r.e/