Nuk ka ujë për ftohjen e impiantit/ Rumania mbyll centralin bërthamor pas rënies së nivelit të Danubit në pikën më të ulët

Rumania ka nisur mbylljen e plotë të centralit të saj të vetëm bërthamor, pasi niveli i ujit në lumin Danub, i përdorur për ftohjen e impiantit, ka rënë në një nivel rekord.

Kompania kombëtare e energjisë bërthamore, Nuclearelectrica, bëri të ditur se reaktori i dytë i centralit të Cernavodës është ndalur për shkak të rënies së vazhdueshme dhe të konsiderueshme të nivelit të Danubit.

Reaktori i parë ishte nxjerrë jashtë funksionit që muajin e kaluar, ndërsa centrali zakonisht prodhon rreth një të pestën e energjisë elektrike të Rumanisë.

Sipas kompanisë, vendimi për ndalimin e reaktorit të dytë u mor pavarësisht masave të ndërmarra për të shmangur mbylljen e plotë të centralit.

Autoritetet kishin ndërhyrë në rrjedhën e lumit, duke shpërthyer një masiv shkëmbor dhe duke vendosur katër maune të mbushura me gurë, me synim devijimin e një pjese të ujit drejt zonës së centralit.

Megjithatë, rënia e mëtejshme e nivelit të Danubit ka bërë që masat të mos jenë të mjaftueshme për të garantuar funksionimin normal të sistemit të ftohjes.

Mbyllja e centralit të Cernavodës vjen në një periudhë kur temperaturat e larta dhe thatësira kanë shkaktuar rënie të ndjeshme të nivelit të ujit në Danub, duke krijuar probleme edhe për sektorë të tjerë që varen nga lumi.