Oberhausen bashkon shqiptarët në Gjermani për Ditën e Alfabetit Shqip

Një mbrëmje festive kushtuar gjuhës, kulturës dhe identitetit shqiptar do të organizohet më 22 nëntor në qytetin e Oberhausenit të Gjermanisë. Në këtë ngjarje pritet të marrin pjesë artistë të njohur shqiptarë dhe bashkatdhetarë nga vende të ndryshme.

Qyteti i Oberhausenit në Gjermani do të jetë nikoqir i një koncerti të veçantë me rastin e Ditës së Alfabetit Shqip, e cila shënohet më 22 nëntor në përkujtim të Kongresit të Manastirit të vitit 1908.

Koncerti do të mbahet në sallën Luise-Albertz-Halle, duke filluar nga ora 18:00, në kuadër të programit kulturor Westbalkantage NRW 2026, shkruan Telegrafi.

Në mesin e artistëve që do të ngjiten në skenë janë Elita 5 & Friends, Mustafa Imeri, Miranda Hashani dhe Jehona Shaqiri & Band.

Sipas Oculus News, kjo ngjarje synon të bashkojë komunitetin shqiptar në Gjermani përmes muzikës dhe një feste të përbashkët kushtuar gjuhës dhe trashëgimisë kombëtare.

Njëri nga organizatorët, Afrim Farizi, është i angazhuar në organizimin e kësaj mbrëmjeje, e cila synon të krijojë një hapësirë ku shqiptarët e diasporës mund të takohen, të festojnë së bashku dhe të ruajnë lidhjen me gjuhën e kulturën e tyre.

Dita e Alfabetit Shqip ka një rëndësi të veçantë në historinë kombëtare. Më 22 nëntor 1908 përfundoi Kongresi i Manastirit, i cili përcaktoi bazat e njësimit të alfabetit të gjuhës shqipe, duke shënuar një hap vendimtar për zhvillimin e arsimit dhe kulturës shqiptare.

Për shqiptarët që jetojnë larg atdheut, aktivitete të tilla përfaqësojnë një mundësi të rëndësishme për t'ua përcjellë gjeneratave të reja gjuhën, traditat dhe identitetin kombëtar.

Koncerti në Oberhausen pritet të jetë një mbrëmje ku muzika dhe kultura do të bashkojnë shqiptarët e të gjitha moshave në Gjermani./Telegrafi/