Operacioni “Hideaway” në Tiranë, arrestohet një 16-vjeçar me mbi 300 doza kokainë dhe kanabis

Një 16-vjeçar është arrestuar në flagrancë në Tiranë, i dyshuar për shitje të lëndëve narkotike në doza, në kuadër të operacionit policor të koduar “Hideaway”.

Sipas Policisë së Tiranës, operacioni u zhvillua nga shërbimet e Komisariatit të Policisë Nr. 3, në bashkëpunim me Seksionin për Hetimin e Narkotikëve, pas informacioneve të siguruara në rrugë operative për një rast të shpërndarjes së drogës.

Gjatë kontrollit fizik ndaj të miturit dhe në vendin ku ai u konstatua, në rrugën “Jordan Misja”, uniformat blu sekuestruan mbi 300 doza të lëndëve të dyshuara narkotike, kokainë dhe cannabis sativa, të përgatitura për shitje.

Po ashtu, u sekuestruan një shumë parash në lekë dhe euro, e dyshuar si e përfituar nga aktiviteti kriminal, si edhe dy telefona celularë.

16-vjeçari akuzohet për veprën penale “Prodhimi dhe shitja e narkotikëve”, ndërsa Policia bën me dije se hetimet vijojnë për identifikimin dhe kapjen e personave të tjerë të përfshirë në këtë veprimtari.

Materialet procedurale i janë referuar Prokurorisë së Tiranës për veprime të mëtejshme.