PAKISTAN – Shpërthim me bombë në një xhami shiite, të paktën 31 të vrarë dhe mbi 150 të plagosur

ISLAMABAD, 6 shkurt /ATSH/- Të paktën 31 persona u vranë dhe më shumë se 150 të tjerë u plagosën pas një sulmi vdekjeprurës në një xhami shiite në kryeqytetin e Pakistanit gjatë lutjeve të së premtes, tha policia.

“Sulmuesi vetëvrasës, i cili iu afrua kompleksit të xhamisë në këmbë, fillimisht hapi zjarr ndaj rojeve të sigurisë në hyrjen kryesore për të hyrë me forcë”, tha zëdhënësi i policisë Taqi Jawad.

Sipas Jawad, i cili citoi një raport paraprak të bazuar në dëshmitarë okularë, sulmuesi hyri në kompleks dhe shpërtheu jelekun vetëvrasës që mbante veshur.

“Mund të konfirmojmë të paktën 31 vdekje deri më tani dhe kemi frikë se numri i të plagosurve do të rritet pasi shumë prej të plagosurve janë në gjendje kritike”, tha Irfan Memon, shefi i administratës lokale.

“Ekipet e shpëtimit transportuan më shumë se 150 të plagosur në spitalet kryesore të qytetit, ku u shpall gjendja e jashtëzakonshme”, tha zyrtari i shpëtimit Mohamed Amir.

Kryeministri i Pakistanit, Shehbaz Sharif dënoi bombardimin dhe urdhëroi autoritetet të ofronin kujdesin më të mirë mjekësor për të plagosurit.

Myslimanët shiitë përbëjnë rreth 20% të popullsisë prej gati 250 milionë banorësh të Pakistanit.

Talebanët pakistanezë dhe grupet ekstremiste të Shtetit Islamik kanë synuar myslimanët shiitë në të kaluarën, megjithëse sulmi i fundit nuk është marrë përsipër nga asnjë milici.

Dhuna nga militantët islamikë është rritur në Pakistan, që nga marrja nën kontroll e Afganistanit fqinj nga milicia talebane.

Talebanët pakistanezë, një grup i ndryshëm nga homologët e tyre afganë, dyshohet se po operojnë nga rajoni kufitar i Afganistanit dhe fshihen pas shumicës së bombardimeve kundër forcave të sigurisë dhe civilëve. //a.i/