Parlamenti Evropian dënon SHBA-në: Kërcënimet për Grenlandën, të papranueshme

Parlamenti Evropian ka dalë sot zyrtarisht në mbrojtje të sovranitetit të Danimarkës dhe Grenlandës, duke dënuar me tone të ashpra retorikën e fundit të administratës amerikane.

Në mbledhjen e sotme, Konferenca e Presidentëve (që përfshin krerët e grupeve politike në PE) miratoi me shumicë dërrmuese një deklaratë të përbashkët. Teksti, i iniciuar nga grupi i Socialistëve dhe Demokratëve, e cilëson qasjen e Presidentit Donald Trump si një shkelje të hapur të parimeve ndërkombëtare.

Mesazhi për Uashingtonin

“Dënojmë në mënyrë të prerë deklaratat e administratës Trump,” thuhet në tekstin e miratuar. Liderët e grupeve parlamentare theksojnë se këto deklarata përbëjnë “një sfidë të qartë ndaj së drejtës ndërkombëtare, parimeve të Kartës së OKB-së dhe sovranitetit të një aleati të NATO-s”.

Parlamenti Evropian nënvizon se çdo tentativë për të minuar integritetin territorial të Kopenhagës dhe Nuukut (kryeqyteti i Grenlandës) është e paligjshme.

“Deklarata të tilla janë të papranueshme dhe nuk kanë vend në marrëdhëniet midis partnerëve demokratikë,” përfundon qëndrimi zyrtar i Brukselit, duke sinjalizuar një krisje të thellë diplomatike mes dy brigjeve të Atlantikut.

/rtsh.al/