Pas protestave masive, dorëhiqet qeveria në Bullgari

Kryeministri Rosen Zhelyazkov dha dorëheqjen të enjten pasi dhjetëra mijëra bullgarë iu bashkuan protestave në të gjithë vendin një natë më parë, duke kërkuar që qeveria të japë dorëheqjen për shkak të akuzave për korrupsion.

“Ne e dëgjojmë zërin e qytetarëve, duhet t’u përgjigjemi kërkesave. Si të rinjtë ashtu edhe të moshuarit ngritën zërin e tyre në favor të dorëheqjes. Ky qëndrim qytetar duhet të inkurajohet“, tha Zhelyazkov, duke njoftuar dorëheqjen e kabinetit të tij në një seancë të jashtëzakonshme në Asamblenë Kombëtare.

“Megjithatë, një sfidë na pret, protestat duhet të përcjellin se cili duhet të jetë profili i qeverisë nga ky moment e tutje“, shtoi ai.

“Qytetarët duhet ta kërkojnë këtë nga udhëheqësit e protestës, kjo është një thirrje për një qeveri që ndërton mbi arritjet e atyre të mëparshme, por përmes një tranzicioni të mirë.”

Vlerësimet e medias bazuar në pamjet e droneve e çojnë numrin e demonstruesve në mbi 100,000, me disa raportime që pretendojnë se deri në 150,000 njerëz ishin mbledhur në kryeqytetin bullgar, Sofje.

Protesta të mëtejshme u zhvilluan në më shumë se 25 qytete të mëdha në të gjithë Bullgarinë, duke përfshirë Plovdivin, Varnën, Veliko Tarnovon dhe Razgradin.

Bullgarët jashtë vendit u mblodhën gjithashtu të mërkurën, me demonstrata të mbajtura në Bruksel, Londër, Berlin, Vjenë, Zyrih dhe Nju Jork.