Philip Glass bojkoton Qendrën Kennedy në protestë ndaj Trump: Portreti i Lincoln-it bie ndesh me vlerat e sotme

Kompozitori legjendar Philip Glass i është bashkuar listës në rritje të artistëve që po bojkotojnë Qendrën prestigjioze “Kennedy”, në shenjë proteste ndaj politizimit të institucionit nga ish-presidenti Donald Trump.

Në prag të 89-vjetorit të tij, Glass ka marrë vendimin drastik për të tërhequr premierën botërore të Simfonisë së tij Nr. 15 “Lincoln”, e cila ishte planifikuar të luhej në qershor nga Orkestra Simfonike Kombëtare (NSO).

Konflikti i vlerave

Simfonia, e cila ishte porositur për të nderuar figurën e Abraham Lincoln-it dhe për të shënuar 250-vjetorin e pavarësisë amerikane, nuk do të tingëllojë në sallën e Qendrës Kennedy. Glass ishte i qartë në arsyetimin e tij:

“Simfonia është një portret i Lincoln-it dhe vlerat e Qendrës Kennedy sot janë në konflikt të drejtpërdrejtë me mesazhin e Simfonisë. Ndjej një detyrim moral ta tërheq atë nga Qendra Kennedy nën udhëheqjen e saj aktuale,” deklaroi kompozitori, i cili konsiderohet një nga pionierët e minimalizmit në muzikë.

Eksodi i artistëve

Largimi i Glass nuk është një rast i izoluar, por pika kulmore e një krize institucionale. Qendra Kennedy është përfshirë në polemika pasi Trump ndryshoi përbërjen e bordit drejtues, duke zëvendësuar anëtarët demokratë me besnikë të tij politikë. Kjo ka shkaktuar një valë dorëheqjesh dhe anulimesh:

Renée Fleming, sopranoja e famshme dha dorëheqjen si këshilltare artistike dhe anuloi shfaqjet e planifikuara.

Kompania Kombëtare e Operas, pas dekadash bashkëpunim (që nga 1971), kompania është tërhequr nga Qendra.

Artistë të tjerë si Lin-Manuel Miranda, Bela Fleck dhe Issa Rae kanë ndërprerë gjithashtu angazhimet.

Kriza financiare dhe e reputacionit

Përveç dëmit artistik, Qendra Kennedy po përballet me pasoja të rënda financiare. Raportohet për një rënie të ndjeshme të shitjes së biletave, çka sinjalizon një bojkot të heshtur nga publiku, i cili po reagon ndaj transformimit të një institucioni kulturor jopartiak në një arenë politike.

/rtsh.al/