Princi Harry i përgjigjet Trumpit: Sakrifica e NATO-s meriton respekt, jo gënjeshtra

Debati mbi rolin e aleatëve të NATO-s në Afganistan është ndezur edhe më tej, pasi në skenë ka hyrë një nga veteranët më të njohur britanikë: Princi Harry. Duka i Sussex ka lëshuar një deklaratë emocionale dhe të drejtpërdrejtë në përgjigje të komenteve të Donald Trump, i cili pretendoi se trupat aleate nuk kishin qenë në vijën e parë të frontit.

Harry, i cili ka shërbyer dy herë në Afganistan, mbrojti me forcë kontributin e ushtrive aleate, duke kujtuar se Neni 5 i NATO-s u aktivizua për herë të vetme në histori pikërisht për të mbështetur SHBA-në pas sulmeve të 11 Shtatorit.

Në deklaratën e tij, Duka foli si ushtar, jo si princ. Ai solli në vëmendje koston e rëndë njerëzore që Mbretëria e Bashkuar dhe aleatët e tjerë paguan në atë luftë.

“Kam shërbyer atje. Atje krijova miq për gjithë jetën. Dhe atje humba miq. Vetëm në Mbretërinë e Bashkuar u vranë 457 ushtarë,” shkruan Harry.

Ai theksoi se mijëra jetë ndryshuan përgjithmonë, me prindër që varrosën fëmijët dhe fëmijë që mbetën jetimë.

“Ato sakrifica meritojnë të fliten me vërtetësi dhe respekt,” nënvizoi ai.

Profili ushtarak i Dukës

Reagimi i Princit Harry vjen nga pozita e dikujt që e ka parë luftën nga afër gjatë 10 viteve të shërbimit të tij në ushtri.

Viti 2008: Ai u dërgua fshehurazi në Afganistan për 10 javë si kontrollues i sulmeve ajrore, por u tërhoq pasi media zbuloi vendndodhjen e tij.

Viti 2012: U rikthye për herë të dytë, kësaj radhe si bashkëpilot dhe mitralier i helikopterit sulmues “Apache”.

Në librin e tij autobiografik “Spare”, Harry ka zbuluar se gjatë shërbimit ka vrarë 25 luftëtarë talebanë, një fakt që, siç shkruan ai, “nuk më mbushte me krenari, por as nuk më turpëronte”.

Deklarata e Harry-t i bashkohet asaj të Kryeministrit britanik Keir Starmer, duke krijuar një grup në Londër kundër rishkrimit të historisë së luftës në Afganistan.

/rtsh.al/