Qendra për të Drejtat e Gruas Rome vlerësohet me çmimin e BE-së për integrimin e romëve në Shqipëri

TIRANË, 11 prill /ATSH/ Delegacioni i Bashkimit Evropian në Tiranë uroi sot Qendrën për të Drejtat e Gruas Rome (QDGR) dhe Latif Kazanxhiun  për vlerësimin me Çmimin e BE-së për Integrimin e Romëve në Shqipëri.

E udhëhequr nga gra rome, QDGR-ja po sjell ndryshim të vërtetë. Falë punës së tyre janë mbyllur dy shkolla të dedikuara për fëmijët e komunitetit rom, të cilët më pas janë ndihmuar të përfshihen në arsimin e zakonshëm.

Ato gjithashtu kanë mbështetur mbi 600 të rritur për të vijuar shkollimin, po fuqizojnë gratë rome për të hapur biznese dhe po luftojnë për barazi në arsim.

Prej 30 vitesh, Latif Kazanxhiu ka qenë mbrojtës i të drejtave arsimore të komunitetit rom. Nga mësimi i fëmijëve në shtëpi deri te krijimi i një qendre digjitale për të rinjtë, ai po thyen stereotipe dhe po ndërton më shumë mundësi për komunitetin e tij.

Së bashku me nisma frymëzuese nga Ballkani Perëndimor dhe Turqia, puna e tyre po sjell një ndikim të vërtetë në komunitetet rome—duke avancuar përfshirjen, fuqizimin dhe progresin në përputhje me vlerat dhe mbështetjen e Bashkimit Evropian.

Komisioni Evropian shpalli 15 fituesit  e edicionit të 6 -të të Çmimit të BE-së për Integrimin e Romëve në Ballkanin Perëndimor dhe Turqi.

Çmimi i sivjetshëm njeh arritjet që promovojnë integrimin e romëve përmes arsimit.

Ceremonia e ndarjes së çmimeve u zhvillua më 10 prill si pjesë e Javës së Romëve të BE-së 2025 (7-10 prill).

Çmimi është një kujtesë e qartë e faktit se qytetarët romë janë një pjesë e rëndësishme e zgjerimit, por shumë shpesh i përkasin grupeve më të cenueshme të popullsisë.

Trajtimi i kësaj situate dhe sjellja e zgjidhjeve që mbështesin integrimin e qytetarëve romë është një pjesë e rëndësishme e punës që po bën Komisioni dhe ky çmim është një shembull i qartë se përparimi është i mundur.

Më konkretisht, çmimi i BE-së njeh angazhimin e fituesve në fuqizimin e romëve për të shfrytëzuar potencialin e tyre të plotë si anëtarë të shoqërisë.

Çmimi i këtij viti tregon rëndësinë e arsimit si një shtytës kryesor për ndërtimin e qëndrueshmërisë së komuniteteve rome përballë ndryshimeve dhe krizave sociale, ekonomike, mjedisore, shëndetësore dhe politike.

Arsimi ngjall besim dhe ndjenjën e përkatësisë, inkurajon pjesëmarrjen aktive brenda komuniteteve dhe është një katalizator për rritje dhe zhvillim.

Para ceremonisë së ndarjes së çmimeve u mbajt një debat për rëndësinë e arsimit cilësor dhe gjithëpërfshirës, ​​me pjesëmarrjen e Ciprian Necula, President i Fondacionit për Arsimimin e Romëve të Fondacioneve të Shoqërisë së Hapur, Vesna Dzuteska-Bisheva, përfaqësuese e UNDP-së përgjegjëse për rritjen gjithëpërfshirëse, Gabriela Hrabanova, drejtoreshë e Rrjetit ERGO dhe Nesime Salioska, ish fituese e çmimit.

Çmimi i BE-së për Integrimin e Romëve në Ballkanin Perëndimor dhe Turqi u krijua në vitin 2014  për të  njohur rëndësinë e integrimit të romëve në partnerët e zgjerimit të BE-së.

Organizatat fituese të shoqërisë civile marrin një çmim monetar prej 8,000 € për çmimin e parë dhe 5,000 € për çmimin e dytë për të vazhduar punën e tyre në arsimin e romëve. Fituesit e sektorit privat dhe publik morën çmime jo monetare. Të gjithë fituesit u shpërblyen me një vizitë studimore në Bruksel, një trofe dhe një diplomë çmimi si pjesë e njohjes për kontributin e tyre të jashtëzakonshëm.

Edicioni i 6 -të i vitit 2025 shpërbleu 15 fitues të përzgjedhur nga një total prej 100 aplikimesh dhe nominimesh nga Ballkani Perëndimor dhe Turqia .

Fituesit janë zgjedhur për angazhimin e tyre në mbështetje për aksesin në arsimin e hershëm për fëmijët romë. Parandalimi i braktisjes së shkollës dhe ofrimi i mbështetjes akademike për nxënësit romë.  Fuqizimi i vajzave dhe grave të reja rome nëpërmjet zhvillimit të aftësive dhe mundësive të lidershipit. Mbështetje për prindërit romë për t’u angazhuar në edukimin e fëmijëve të tyre. Lufta kundër segregacionit në shkolla.  Mbështetja e shkrim-leximit dhe gjuhës për studentët romë, përfshirë të rriturit. Udhëzime në karrierë dhe trajnime profesionale, duke përfshirë aftësitë dixhitale, për të rinjtë romë. /j.p/

1 nga 3