Rama në 35-vjetorin e PS: “Gramoz Ruçi është kryepatronazhisti i Partisë Socialiste”

Kryeministri Edi Rama ka vlerësuar publikisht rolin e patronazhistëve të Partisë Socialiste gjatë festimeve për 35-vjetorin e krijimit të kësaj force politike, duke veçuar ish-kryetarin e Kuvendit Gramoz Ruçi si “kryepatronazhistin” e PS-së.

Në fjalën e mbajtur gjatë aktivitetit, Rama tha se Ruçi ka ndërtuar ndër vite një rrjet të gjerë kontaktesh me qytetarët në të gjithë vendin dhe ka ruajtur komunikim të vazhdueshëm me ta, duke e cilësuar këtë si një nga arsyet e ndikimit të tij politik.

“Gramozi është kryepatronazhisti i PS-së. Unë çmoj punën e të gjithëve, por mbi të gjitha punën e patronazhistëve”, deklaroi Rama.

Kryeministri tregoi edhe disa episode me nota humori për Ruçin, duke thënë se ai nuk përdor rrjetet sociale dhe se komunikon me qytetarët kryesisht përmes telefonit.

“35 vite Facebook jo, Instagram jo, TikTok jo e jo. Por që kur ka dalë telefoni celular, asnjë SMS s’ka bërë akoma deri tani që flasim. I punon telefoni vetëm në marrje SMS-sh”, u shpreh Rama.

Sipas tij, askush brenda Partisë Socialiste nuk ka aq kontakte sa Gramoz Ruçi dhe nuk ka zhvilluar aq shumë takime me qytetarë në ngjarje familjare, vizita apo aktivitete të ndryshme.

Deklarata e Ramës vjen në një kohë kur termi “patronazhist” ka qenë objekt debatesh të forta politike në Shqipëri, sidomos pas publikimit të bazave të të dhënave elektorale në vitet e fundit. Megjithatë, kryeministri e paraqiti rolin e patronazhistëve si një formë organizimi dhe komunikimi të drejtpërdrejtë me qytetarët.

Festimet për 35-vjetorin e Partisë Socialiste mblodhën në Tiranë drejtues, themelues dhe mbështetës të kësaj force politike, të cilët rikujtuan rrugëtimin e saj politik ndër vite dhe objektivin për integrimin e Shqipërisë në Bashkimi Europian.