Rrëshqitja masive e dherave dhe e shkëmbinjve në Dragostunjë, MIE dhe ARRSH: Po punojmë për hapjen e rrugës dhe largimin e rrezikut

Qarkullimi i automjeteve në aksin kombëtar Librazhd-Qafë Thanë është paralizuar plotësisht ditën e sotme, si pasojë e një rrëshqitjeje masive të dherave dhe shkëmbinjve.

Ngjarja është regjistruar në fshatin Dragostunjë, në segmentin Librazhd-Përrenjas (rreth 3 km larg Librazhdit). Ministria e Infrastrukturës dhe Energjisë (MIE) bën me dije se shkak për këtë situatë janë bërë reshjet e dendura të javëve të fundit, të cilat kanë sjellë erozion të theksuar të shpatit malor.

Situata në terren

Sipas njoftimit zyrtar, masivi i dherave është shkëputur nga shpati i sipërm i hekurudhës, duke bllokuar fillimisht trasenë e trenit dhe duke përfunduar më pas në rrugën nacionale poshtë saj.

Për pasojë, lëvizja është ndërprerë në të dyja drejtimet prej shumë orësh, duke krijuar radhë të gjata mjetesh.

Ndërhyrja e autoriteteve Autoriteti Rrugor Shqiptar (ARRSH) dhe kompania kontraktore e mirëmbajtjes kanë zbarkuar menjëherë në vendngjarje. Për zhbllokimin e situatës janë angazhuar:

6 ekskavatorë;

2 fadroma;

Grupe punonjësish të emergjencës.

MIE sqaron se operacioni është kompleks.

“Paralelisht me pastrimin e materialit të rënë, po bëhet edhe çmontimi i masivit që ka lëvizur dhe që është ende i paqëndrueshëm, për të shmangur çdo rrezik të mundshëm për rënie të mëtejshme mbi rrugë,” thuhet në njoftim.

Apeli për drejtuesit e mjeteve

Autoritetet u kanë bërë thirrje drejtuesve të automjeteve për mirëkuptim dhe durim, pasi ndërhyrja është e domosdoshme për të garantuar sigurinë e plotë para rihapjes së qarkullimit. Puna po vijon me intensitet të lartë për rikthimin e normalitetit sa më shpejt të jetë e mundur.

/rtsh.al/