Rritja më e madhe që prej Luftës së Dytë Botërore/ Trump kërkon 1.5 trilion dollarë për mbrojtjen
Presidenti i Shtetet e Bashkuara të Amerikës, Donald Trump, i ka kërkuar Kongresit një rritje të ndjeshme të shpenzimeve për mbrojtjen, duke propozuar një buxhet prej 1.5 trilion dollarësh.
Sipas mediave amerikane, rritja vjetore e shpenzimeve të Pentagon do të ishte më e madhja që nga Lufta e Dytë Botërore. Megjithatë, buxhetet presidenciale janë propozime që duhet të miratohen nga Kongresi dhe nuk janë vendime detyruese.
“Buxheti ndërtohet mbi nivelin historik prej 1 trilion dollarësh për mbrojtjen në vitin 2026 dhe kërkon 1.5 trilionë dollarë për vitin 2027″, thuhet në dokument. “Kjo përfaqëson një rritje prej 445 miliardë dollarësh, ose 42%, krahasuar me nivelin e vitit 2026″.
Sipas përmbledhjes së Shtëpisë së Bardhë, propozimi i Trump parashikon edhe uljen me 10% të shpenzimeve jo-ushtarake, duke zhvendosur disa përgjegjësi te qeveritë shtetërore dhe lokale.
Edhe para luftës, Trump kishte sinjalizuar synimin për të rritur shpenzimet në mbrojtje për të modernizuar ushtrinë për kërcënimet e shekullit XXI.
Pentagoni, muajin e kaluar, propozoi 200 miliardë dollarë për përpjekjet e luftës dhe për rimbushjen e municioneve dhe furnizimeve.
Duke folur përpara një fjalimi drejtuar kombit këtë javë, Trump e bëri të qartë se prioriteti i tij është ushtria, duke paralajmëruar një përplasje të mundshme me Kongresin.
“Ne jemi duke luftuar luftëra. Nuk mund të kujdesemi për çerdhet”, tha ai në një aktivitet privat në Shtëpinë e Bardhë.
“Nuk është e mundur që ne të kujdesemi për… Medicaid, Medicare dhe të gjitha këto çështje individuale. Ato mund të menaxhohen në nivel shtetëror. Nuk mund të bëhen në nivel federal”.
Dokumenti i këtij viti i Shtëpisë së Bardhë, i përgatitur nga drejtori i buxhetit Russ Vought, synon të shërbejë si një udhërrëfyes për Kongresin, ndërsa ligjvënësit hartojnë buxhetet dhe projektligjet e tyre vjetore për financimin e qeverisë.