SHBA - Demokratët triumfojnë në zgjedhje, marrin Senatin dhe Dhomën e Përfaqësuesve - ATSH -

UASHINGTON, 5 nëntor /ATSH – Demokratët amerikanë kanë marrë kontrollin e Senatit dhe Dhomës së Përfaqësuesve duke  sfiduar kështu agjendën e Trump deri në fund të mandati, shkruan BBC.

Demokratët në Shtetet e Bashkuara kanë fituar kontrollin e Senatit dhe Dhomës së Përfaqësuesve, duke marrë drejtimin e Kongresit për pjesën e mbetur të presidencës së Donald Trump.

Fitorja përfaqëson një rezultat të rëndësishëm elektoral për Partinë Demokratike, e cila arriti të sigurojë një sërë suksesesh të papritura edhe në bastionet tradicionale republikane.

Në garën për Senatin, demokratët fituan në disa shtete ku republikanët kishin mbështetje të fortë, përfshirë Teksasin, Ohion dhe Kansasin. Ky i fundit nuk kishte zgjedhur një senator demokrat prej gati 100 vitesh.

Presidenti Donald Trump, në një intervistë për Fox News, pranoi rezultatin, duke vlerësuar performancën e demokratëve. “Ata bënë një punë të mirë. Jam pak i befasuar”, deklaroi ai.

Marrja e kontrollit të të dyja dhomave të Kongresit i jep opozitës demokrate mundësinë të pengojë ose të vështirësojë zbatimin e planeve të presidentit Trump gjatë dy viteve të ardhshme.

Demokratët mund të përdorin gjithashtu shumicën e re parlamentare për të nisur procedura të reja politike ndaj presidentit, përfshirë mundësinë e një procesi të tretë shkarkimi (impeachment).

Rezultati shënon një ndryshim të rëndësishëm të ekuilibrit politik në Uashington, duke kufizuar hapësirën e veprimit të administratës Trump në Kongres.  /os/

Sipas Ligjit Nr.35/2016 “Për të drejtat e autorit dhe të drejtat e tjera të lidhura me to”, i ndryshuar, ndalohet kopjimi, publikimi, shpërndarja dhe tjetërsimi pa cituar Agjencinë Telegrafike Shqiptare.