SHBA – Gjykata e Lartë rrëzon tarifat globale të Trump: Tejkaloi kompetencat ligjore

UASHINGTON, 20 shkurt /ATSH/- Gjykata Supreme e Shteteve të Bashkuara të Amerikës ka rrëzuar tarifat gjithëpërfshirëse të presidentit të SHBA-së Donald Trump, të cilat ai i ndoqi sipas një ligji të destinuar për përdorim në emergjenca kombëtare, duke hedhur poshtë një vendim me implikime vendimtare për ekonominë globale, sipas “Reuters”.

Vendimi i sotëm vjen pasi Trump përdori tarifat – taksat ndaj mallrave të importuara – si një mjet kyç ekonomik dhe të politikës së jashtme.

Ato kanë qenë kryesore në një luftë globale tregtare që Trump nisi – pasi filloi mandatin e tij të dytë si president, një luftë që ka larguar partnerët tregtarë, ka ndikuar në tregjet financiare dhe ka shkaktuar pasiguri ekonomike globale.

Gjyqtarët, në një vendim të shkruar nga kryetari i Gjykatës Konservatore, John Roberts, mbështetën vendimin e një gjykate më të ulët – se “përdorimi i këtij ligji të vitit 1977 nga presidenti republikan i tejkalonte kompetencat e tij“.

Roberts, duke cituar një vendim të mëparshëm të Gjykatës Supreme, shkroi se presidenti Trump duhej të tregonte autorizim të qartë kongresional, për të justifikuar deklaratën e tij të jashtëzakonshme të fuqisë për të vendosur tarifa”, duke shtuar: “Ai nuk mundet”.

Gjykata Supreme arriti në përfundimin se Kushtetuta “shumë qartë” i jep Kongresit fuqinë për të vendosur taksa, të cilat përfshijnë tarifat.

Gjyqtarët e bënë të qartë se sipas Kushtetutës së SHBA-së, vetëm Kongresi ka autoritetin për të vendosur taksa dhe tarifa.

Nuk ishte menjëherë e qartë se si vendimi i Gjykatës së Lartë do të ndikonte në tarifat e rëna dakord sipas marrëveshjeve të tilla dypalëshe tregtare.

Gjithashtu mbeti e pasigurt nëse kompanitë do të kishin të drejtë për rimbursime për detyrimet e paguara, tashmë sipas skemës së tarifave të rrëzuar të premten.

Vëzhguesit kanë paralajmëruar për kaos të mundshëm burokratik nëse qeveria do të detyrohej të rimbursonte miliarda dollarë importuesve që paguan tarifat.

Për Trump – i cili i ka përshkruar vazhdimisht tarifat si një nga mjetet e tij të preferuara të politikës – vendimi shënon një humbje të madhe.

Trump argumentoi se një çekuilibër i vazhdueshëm në tregtinë ndërkombëtare përbënte një kërcënim për sigurinë kombëtare dhe për këtë arsye përbënte një emergjencë kombëtare.

Disa kompani dhe shtete amerikane kundërshtuan masat në gjykatë. Gjykatat e shkallës së parë vendosën në favor të tyre, por Trump apeloi, duke lejuar që tarifat të qëndronin në fuqi ndërsa çështja do të vazhdonte në Gjykatën Supreme të dominuar nga konservatorët.

Në vendimin e saj, gjykata tha se Shtetet e Bashkuara të Amerikës, nuk ishin në luftë me vendet në fjalë dhe se masat për këtë arsye nuk mund të justifikoheshin sipas fuqive të kohës së luftës.

“Në kohë paqeje, presidenti nuk ka autoritetin për të vendosur tarifa”, thanë gjyqtarët. //a.i/