SHBA-të synojnë përfundimin e luftës në këtë datë

Sipas një burimi izraelit, pas deklaratave të Donald Trump, Shtetet e Bashkuara kanë vendosur datën 9 prill si afat për përfundimin e luftës me Iran.

Raportohet se negociatat mes SHBA-ve dhe Iranit mund të zhvillohen këtë javë në Pakistan.

Burimi thekson se kjo datë do t’i mundësonte Trump-it të vizitojë Izraelin gjatë Ditës së Pavarësisë.

“(Irani) dëshiron shumë të arrijë një marrëveshje. Edhe ne duam të arrijmë një marrëveshje. Do të lidhemi sot, ndoshta me telefon, sepse është shumë e vështirë… për ta të dalin jashtë, mendoj”, tha Trump më herët për mediat.

Trump tha se do të shohë si do të shkojë pauza pesë-ditore e sulmeve amerikane ndaj centraleve elektrike iraniane, duke shtuar se nëse nuk ka zgjidhje, “ne thjesht do të vazhdojmë bombardimet me gjithë zemër.”

Takim SHBA-Iran në Islamabad?

Sipas Axios, po punohet për një takim mes Mohammad Bagher Ghalibaf dhe zyrtarëve amerikanë si Steve Witkoff dhe Jared Kushner në Islamabad.

Në takim mund të marrë pjesë edhe zëvendëspresidenti amerikan JD Vance. Qëllimi është avancimi i dialogut mes SHBA-ve dhe Iranit përmes ndërmjetësve rajonalë.