Samiti i Berlinit, Ambasada gjermane në Kosovë: Promovon reforma thelbësore për anëtarësim në BE

Në kuadër të Samitit të Procesit të Berlinit i cili mbahet sot (22 tetor) në Londër, në punimet e së cilit marrin pjesë liderët e Ballkanit Perëndimor dhe të Bashkimit Evropian, Ambasada e Gjermanisë në Kosovë, deklaron se samiti promovon reforma thelbësore për anëtarësimin në BE, si një mjet për forcimin e sundimit të ligjit, demokracisë dhe përpjekjeve kundër korrupsionit.

Me anë të një postimi në rrjetin social Facebook, Ambasada shkruan se shkruan se pas një viti përgatitjesh intensive, numërimi mbrapsht ka filluar për një vrull të ri, rezultate të prekshme dhe një vizion të përbashkët për të ardhmen e Ballkanit Perëndimor në Evropë.

“I iniciuar nga Gjermania në vitin 2014, Procesi i Berlinit ka një qëllim të qartë: të mbështesë aspiratat e anëtarësimit në BE të gjashtë shteteve të Ballkanit Perëndimor, duke nxitur njëkohësisht bashkëpunimin midis tyre. Ai sjell përmirësime të dukshme në jetën e njerëzve me ndikim të menjëhershëm, siç është heqja e tarifave të roaming-ut ose marrëveshjet e lëvizshmërisë që mundësojnë udhëtimin ndërkufitar dhe njohjen e ndërsjellë të kualifikimeve profesionale dhe akademike”, shkruan Ambasada e Gjermanisë në Kosovë.

Procesi i Berlinit promovon reforma thelbësore për anëtarësimin në BE, jo si qëllim në vetvete, por si një mjet për të forcuar sundimin e ligjit, demokracinë dhe përpjekjet kundër korrupsionit, duke përfituar drejtpërdrejt shoqërinë. Një BE e fortë është jetike: stabiliteti dhe bashkëpunimi në Ballkanin Perëndimor janë të domosdoshëm për sigurinë dhe prosperitetin në Evropë.

“Fokusi ynë është aktualisht në Londër, ku udhëheqësit e qeverive të Ballkanit Perëndimor takohen sot për ngjarjen e fundit të Samitit të Procesit të Berlinit këtë vit. Bashkëpunimi i ngushtë në këto fusha jo vetëm që forcon çdo vend në rajon, por gjithashtu i shërben interesave të përbashkëta të BE-së dhe Mbretërisë së Bashkuar. Një Ballkan Perëndimor i sigurt do të thotë një Evropë e sigurt”, shkruan Ambasada e Gjermanisë në Kosovë.