Shqipëri – Kosovë, bashkëpunim për mbrojtjen e të drejtave të punëtorëve

Tiranë, 23 maj /ATSH/ Shqipëria dhe Kosova nënshkruan një memorandum mirëkuptimi për forcimin e bashkëpunimit rajonal në fushën e inspektimit të punës dhe mbrojtjes së të drejtave të punëtorëve.

Ky angazhim i përbashkët synon ndërtimin e një kuadri të koordinuar për sigurimin e zbatimit të ligjeve të punës, përmirësimin e sigurisë në vendin e punës dhe mbrojtjen e të drejtave të punëtorëve, duke përfshirë punëtorët migrantë dhe grupet e margjinalizuara në të dy vendet.

Marrëveshja parashikon zhvillimin e inspektimeve të përbashkëta ose të bashkërenduara, shkëmbimin e informacionit përmes protokolleve të qarta ndërinstitucionale, si dhe nisma ndërgjegjësuese për punëdhënësit dhe punëmarrësit mbi të drejtat dhe detyrimet ligjore.

Një tjetër aspekt i rëndësishëm i bashkëpunimit është forcimi i kapaciteteve institucionale dhe profesionale të inspektorateve të punës në Shqipëri dhe Kosovë, duke përfshirë trajnimin dhe mbështetjen për inspektorët e punës në të dy vendet.

Ky bashkëpunim, i mbështetur nga partnerët e GIZ, është një shembull i qartë i unitetit rajonal në promovimin e praktikave të sigurta dhe të drejta të punës, duke krijuar baza për përmirësime të qëndrueshme në qeverisjen e tregut të punës në Shqipëri dhe Kosovë.

1 nga 6

/a.f/