Shtëpia e Bardhë: Vijojnë bisedimet trilaterale me Iranin dhe Pakistanin në Islamabad
Shtëpia e Bardhë ka konfirmuar se bisedimet trilaterale me Iranin dhe Pakistanin, të synuara për t’i dhënë fund luftës në Lindjen e Mesme, janë duke vazhduar në Islamabad.
Një zyrtar i lartë i Shtëpisë së Bardhë deklaroi në një njoftim të shkurtër se negociatat po vazhdojnë, pas raportimeve të medias shtetërore iraniane se janë zhvilluar dy raunde bisedimesh dhe pritet një i tretë.
Sipas korrespondentit të televizionit shtetëror iranian (IRIB), një burim i afërt me ekipin negociator ka thënë se “një raund tjetër negociatash ka gjasa të mbahet sonte ose nesër”.
Ndërkohë, një reporter i televizionit shtetëror iranian në Islamabad raporton se po bëhen përpjekjet e fundit për të mbyllur hendekun midis palëve.
Ai akuzoi Shtetet e Bashkuara se po vazhdojnë me kërkesa “ekstravagante”, ndërsa agjencia iraniane e lajmeve Tasnim thekson se Ngushtica e Hormuzit mbetet një nga pikat kryesore të mosmarrëveshjes së rëndë. Republika Islamike, sipas burimeve iraniane, po insiston në ruajtjen e fitimeve të saj ushtarake, transmeton AP.
Këto bisedime konsiderohen si niveli më i lartë i kontakteve direkte midis SHBA-së dhe Iranit në dekada, me Pakistanin në rol ndërmjetësues.
Delegacioni amerikan drejtohet nga Zëvendëspresidenti JD Vance, ndërsa pala iraniane përfshin figura të nivelit të lartë si Kryetari i Parlamentit Mohammad Bagher Ghalibaf.
Ndërkaq, ende nuk ka njoftime zyrtare për përparim konkret, burimet tregojnë se tensionet mbeten të larta, veçanërisht rreth çështjeve si trafiku në Ngushticën e Hormuzit dhe ruajtja e balancave ushtarake në rajon.
/rtsh.al/