Shtëpia e Bardhë bllokon raportin e inteligjencës, FBI paralajmëron për rrezik të lartë ndërsa Trump e minimizon
Një raport i inteligjencës amerikane i datës 20 mars, i siguruar nga Reuters, ka paralajmëruar se qeveria iraniane paraqet një “kërcënim të vazhdueshëm” ndaj objektivave në Shtetet e Bashkuara, përfshirë personelin ushtarak dhe qeveritar, institucionet hebraike dhe izraelite, si dhe disidentët iranianë që jetojnë në SHBA.
Raporti u shpërnda nga FBI dhe agjenci të tjera të sigurisë, duke theksuar rrezikun e shtuar pas nisjes së konfliktit me Iranin.
Megjithatë, Shtëpia e Bardhë ka minimizuar publikisht mundësinë e një sulmi në territorin amerikan.
Presidenti Donald Trump, i pyetur më 11 mars në oborrin e Shtëpisë së Bardhë, tha: “Jo, nuk jam i shqetësuar.” Javën e kaluar, Trump e ashpërsoi retorikën, duke paralajmëruar se “një e tërë civilizim do të vdesë sonte” nëse Teherani nuk plotësonte kërkesat e tij, por më pas shtyu afatin e sulmit të paralajmëruar me dy javë.
Raporti i FBI, i titulluar “Public Safety Awareness Report”, u publikua pak javë pasi mediat raportuan se Shtëpia e Bardhë kishte bllokuar një dokument të ngjashëm të inteligjencës.
Zëdhënësja e Shtëpisë së Bardhë, Abigail Jackson, tha se administrata po sigurohej që çdo informacion të verifikohej plotësisht para publikimit, duke akuzuar mediat se po “shtojnë frikë pa kontekst të plotë”.
Raporti paralajmëronte për mundësinë e kërcënimeve fizike të larta, duke përmendur se shërbimet iraniane kanë tentuar rrëmbime dhe vrasje të amerikanëve në vitet e fundit.
Metodat e përdorura kanë përfshirë armë zjarri, thika, sulme me automjete, bomba, helmime dhe zjarrvënie. Sipas dokumentit, Teherani preferon të përdorë operativë me status ligjor në SHBA dhe ka shfrytëzuar rrjetet sociale, aplikacionet e hartave dhe teknikat e phishing për të zgjedhur objektiva dhe për të vlerësuar masat e sigurisë.
Raporti shton se qeveria iraniane ka tentuar të tërheqë viktima në vende më afër gjeografikisht Iranit, “pothuajse me siguri për rrëmbim dhe ekzekutim”.
Ndërkohë, sondazhet tregojnë se shumica e amerikanëve kundërshtojnë luftën dhe kërkojnë përfundimin e shpejtë të saj. Një anketë e Reuters/Ipsos zbuloi se dy të tretat e qytetarëve mendojnë se SHBA duhet të tërhiqet sa më shpejt nga konflikti, duke e bërë perceptimin publik të kërcënimit veçanërisht të rëndësishëm.
Raporti i FBI u sigurua përmes kërkesave të hapura për dokumente nga organizata jofitimprurëse “Property of the People” dhe u shpërnda me Reuters. Ai u bën thirrje autoriteteve të sigurisë në nivel shtetëror dhe lokal që të mbeten vigjilentë dhe të ndajnë çdo informacion shqetësues me autoritetet federale.
/rtsh.al/