Siria njeh Kosovën

Siria bëhet shteti i 120-të që njeh Kosovën.

Lajmi është bërë i ditur nga Presidentja Vjosa Osmani, e cila përmes një postimi në rrjetet sociale falenderon Princin e Arabisë Saudite Muhammed bin Salman Al Saud, i cili ka luajtur rolin e negociatorit.

“Me mbështetjen e Lartësisë së tij Mbretërore, Princit të Kurorës së Arabisë Saudite, Muhammed bin Salman Al Saud, sot ne Riad arritëm marrëveshjen nëpërmjet së cilës Republika Arabe e Sirisë njeh Republikën e Kosovës”, shkruan Osmani, e cila falenderon edhe presidentin sirian Al Sharaa, raporton Fax News.

“Falënderoj Presidentin Al Sharaa për vendimin për njohje të Kosovës si dhe për mbështetjen e tij për popullin tonë”.

Sipas Osmanit, populli i Kosovës dhe ai i Sirisë kanë vuajtur e sakrifikuar shumë për ta arritur lirinë, “prandaj kjo njohje e ndërsjellë sot nuk është vetëm e sovranitetit shtetëror, por edhe njohje e sakrificës së shumë brezave për të jetuar të lirë”.

“Tani Kosova njihet nga 120 shtete. Republika jonë po ecë përpara dhe nuk ka asgjë që mund ta ndalë”, thotë Osmani.