Skema e dyshuar me “One”/Gjykata e Lartë i jep goditje Arbër Veliajt, rrëzohet ankimi i kompanisë “Gogel”

Gjykata e Lartë ka rrëzuar ankimin për sekuestrimin e disa pajisjeve kompjuterike të kompanisë “Gogel”, në pronësi të Arbër Veliaj, vëllait të kryebashkiakut të arrestuar të Tiranës, Erion Veliaj. Vendimi lë në fuqi veprimet hetimore të kryera në kuadër të një dosjeje që po hetohet nga Prokuroria e Posaçme kundër Korrupsionit dhe Krimit të Organizuar (SPAK).

Kompania “Gogel” është nën hetim për dyshime mbi një skemë të mundshme pastrimi parash në bashkëpunim me shoqërinë e telefonisë celulare One Telecommunications. Sipas hetimeve paraprake, dyshohet se kompania telefonike përfitonte tendera nga Bashkia e Tiranës dhe më pas një pjesë e fondeve kalonin përmes shërbimeve reklamuese tek kompania e Arbër Veliajt.

Në tetor të vitit 2025, agjentët e Byroja Kombëtare e Hetimit sekuestruan pajisje kompjuterike dhe materiale të tjera në zyrat e “Gogel” sh.p.k., në kuadër të hetimeve që lidhen me procedimin penal ndaj Erion Veliajt dhe bashkëshortes së tij, Ajola Xoxa. Ata akuzohen për korrupsion, pastrim parash dhe fshehje pasurie.

Hetimet e SPAK kanë nxjerrë në pah edhe lidhje tregtare të “Gogel” me kompani të tjera të tregut të reklamave dhe eventeve, si ASVL sh.p.k. dhe Kuadr.com sh.p.k.. Sipas dosjes hetimore, këto dy subjekte kanë përfituar fonde të konsiderueshme nga Bashkia e Tiranës për organizimin e aktiviteteve kulturore dhe artistike.

Nga analiza e të dhënave rezulton se gjatë periudhës 2020–2024, Bashkia e Tiranës ka shpenzuar mbi 240 milionë lekë për kontrata dhe sponsorizime të lidhura me këto kompani. Verifikimet e kryera nga SPAK tregojnë se ato kanë pasur marrëdhënie të vazhdueshme financiare edhe me “Gogel” sh.p.k.

Në korrik të vitit 2025, SPAK përfundoi hetimet dhe dërgoi për gjykim Erion Veliajn, Ajola Xoxën dhe disa biznesmenë të tjerë, të dyshuar për krijimin e një skeme korruptive që, sipas akuzës, synonte qarkullimin e fondeve publike të Bashkisë së Tiranës në favor të interesave private.

Ndërkohë, hetimet për Arbër Veliajn janë veçuar nga dosja kryesore dhe vijojnë ende. Prokurorët dyshojnë se kompania e tij “Gogel” mund të ketë pasur rol në skemën e dyshuar financiare, ndërsa provat e sekuestruara pritet të analizohen për të përcaktuar përgjegjësinë penale.