Starmer i kërkon Trumpit të kërkojë falje publike: Gënjeu për rolin e NATO-s në Afganistan, mbi 450 britanikë humbën jetën në fushëbetejë
Marrëdhënia mes dy aleatëve historikë, Britanisë së Madhe dhe Shteteve të Bashkuara, është tensionuar sërish pas deklaratave të fundit të Presidentit Donald Trump mbi NATO-n. Kryeministri britanik, Keir Starmer, i ka bërë thirrje publike kreut të Shtëpisë së Bardhë që të kërkojë falje për pretendimet e tij të rreme se trupat aleate shmangën vijën e parë të frontit gjatë luftës në Afganistan.
Reagimi i ashpër i Londrës erdhi pasi Trump vuri në dyshim besnikërinë e Aleancës, duke deklaruar se “nuk ishte i sigurt” nëse NATO do të mbështeste SHBA-në në momente nevoje.
Ai pretendoi se gjatë konfliktit dy-dekadësh në Afganistan, ushtarët e vendeve të tjera të NATO-s – me përjashtim të amerikanëve – kishin qëndruar larg luftimeve reale.
Këto komente shkaktuan zemërim të menjëhershëm në Mbretërinë e Bashkuar, një vend që ka paguar një çmim të lartë njerëzor në atë konflikt.
“Komentet ishin fyese dhe sinqerisht të tmerrshme,” deklaroi Kryeministri Starmer, duke hedhur poshtë kategorikisht narrativën e Trump.
Për të përgënjeshtruar deklaratën e presidentit amerikan, Starmer iu referua fakteve historike: Mbretëria e Bashkuar dërgoi kontingjentin më të madh të trupave pas SHBA-së në Afganistan. Më shumë se 150,000 ushtarë britanikë shërbyen në teatrin e luftimeve pas pushtimit të vitit 2001, dhe mbi 450 prej tyre humbën jetën në fushëbetejë, shpesh në zonat më të nxehta të konfliktit si provinca Helmand.
/rtsh.al/