Tensionet në rritje, Irani pretendon rrëzimin e avionëve luftarakë amerikanë dhe shpall në kërkim pilotin
Mediat shtetërore dhe agjencitë gjysmëzyrtare në Iran kanë raportuar pretendime këtë të premte, duke deklaruar se forcat ushtarake iraniane kanë rrëzuar avionë luftarakë amerikanë dhe janë në kërkim të një piloti që dyshohet se është katapultuar (hedhur me parashutë).
Sipas agjencisë gjysmëzyrtare të lajmeve “Fars”, Garda Revolucionare e Iranit ka njoftuar rrëzimin e një avioni të dytë amerikan të tipit F-35, i cili po fluturonte mbi hapësirën qendrore të vendit. Ndërkohë, një kanal i lidhur me televizionin shtetëror pretendoi se një tjetër pilot luftarak amerikan ishte detyruar të braktiste avionin e tij mbi Iranin jugperëndimor.
Megjithatë, rrethanat mbeten të paqarta. Raportimet nuk specifikojnë nëse avioni i parë u godit nga forcat iraniane apo pësoi një defekt tjetër teknik. Gjatë transmetimeve, kanali televiziv shfaqi pamje të disa mbetjeve metalike në pjesën e pasme të një kamioni si provë të mundshme, por pa dhënë detaje të mëtejshme për të konfirmuar origjinën e tyre.
Thirrje ekstreme dhe shpërblime për qytetarët
Situata ka marrë një kthesë të pazakontë me thirrjet publike drejtuar qytetarëve. Televizioni shtetëror lokal në provincën Kohkilouyeh dhe Boyer-Ahmad – një rajon thellësisht rural dhe malor që shtrihet në rreth 15,500 kilometra katrorë – u ka bërë thirrje banorëve të dorëzojnë në polici çdo “pilot armik” në këmbim të një “çmimi të çmuar”.
Në disa video të shfaqura më parë në ekran, mesazhet inkurajonin publikun “t’i qëllonte nëse i sheh”, duke iu referuar pamjeve të qarkulluara në mediat sociale që supozohet se tregonin avionë amerikanë në atë zonë. Autoritetet konfirmojnë se një operacion i gjerë kërkimi nga ana e ushtrisë është tashmë në zhvillim e sipër.
Heshtja e SHBA-së dhe historiku i pretendimeve
Deri në këto momente, këto pretendime nuk janë konfirmuar nga burime të pavarura. Komanda Qendrore e SHBA-së (CENTCOM), Pentagoni dhe Shtëpia e Bardhë nuk i janë përgjigjur ende kërkesave të medias për koment mbi situatën.
Nëse këto pretendime rezultojnë të vërteta, kjo do të shënonte një përshkallëzim dramatik të konfliktit, i cili po i afrohet fundit të javës së tij të pestë. Megjithatë, analistët theksojnë se gjatë zhvillimeve të fundit, Irani ka bërë një sërë pretendimesh për rrëzimin e avionëve armiqësorë të pilotuar, të cilat më vonë kanë rezultuar të pavërteta. Ajo që e bën këtë rast të veçantë është fakti se kjo është hera e parë që autoritetet iraniane përdorin televizionin për të angazhuar drejtpërdrejt publikun civil në kërkimin e një piloti.
/rtsh.al/