Tentoi të largohej nga Rinasi, prangoset 41-vjeçari i shpallur në kërkim për narkotikë

Tentativa për t’u larguar nga territori i Shqipërisë ka dështuar për një 41-vjeçar të shpallur në kërkim, i cili ka rënë në prangat e Policisë së Shtetit në pikën e kalimit kufitar të Rinasit.

Shtetasi i identifikuar me inicialet S. Z., 41 vjeç, u ndalua nga shërbimet e Komisariatit të Policisë Rinas në momentin që po tentonte të kalonte kontrollin për të dalë jashtë vendit. Pas verifikimeve në sistem, rezultoi se ky person ishte shpallur në kërkim pasi ndaj tij rëndonte një masë sigurie “Arrest në burg”.

Në njoftimin zyrtar mbi operacionin e ndalimit, autoritetet sqaruan:

“Specialistët e Seksionit për Hetimin e Narkotikëve bënë ekzekutimin e vendimit të Gjykatës, e cila i ka caktuar 41-vjeçarit masën e sigurisë ‘Arrest në burg’, për veprën penale ‘Prodhimi dhe shitja e narkotikëve’.”

Mësohet se ndalimi i tij erdhi si rezultat i koordinimit mes forcave kufitare dhe strukturave hetimore, të cilat po monitoronin lëvizjet e personave me precedentë penalë apo të shpallur në kërkim.

Materialet procedurale i kanë kaluar prokurorisë për veprime të mëtejshme, ndërsa mbi të dyshuarin rëndojnë akuzat e parashikuara nga neni 283 i Kodit Penal. Ky arrestim vjen në vijim të përpjekjeve të shtuara të policisë në pikat kufitare për parandalimin e largimit të personave që tentojnë t’i shpëtojnë drejtësisë.

/rtsh.al/