Thirrja e Kuvendit në seancë të jashtëzakonshme, Bardhi: Spiropali po shkel Kushtetutën për Xhaçkën

Partia Demokratike këmbënguli sërish të enjten për thirrjen e Kuvendit në seancë të jashtëzakonshme. Kryetari i grupit parlamentar të Partisë Demokratike, Gazment Bardhi, duke marrë shkas nga urdhri i kryetares së Kuvendit, Elisa Spiropali për thirrjen e Këshillit të Legjislacionit në 27 gusht, deklaroi se urdhri i kryeparlamentares është antikushtetues.

“Kryetarja e Kuvendit ka detyrimin kushtetues dhe ligjor të thërrasë sesionin e jashtëzakonshëm të Kuvendit brenda 3 ditëve nga paraqitja e kërkesës së 1/5 së deputetëve, për të zbatuar pa vonesa vendimin e Gjykatës Kushtetuese”, deklaroi Bardhi.

Sipas tij, mbledhja e Këshillit të Legjislacionit, përveçse është një zvarritje e panevojshme e procedurës për heqjen e mandatit të Olta Xhaçkës, është konsideruar edhe një procedurë antikushtetuese nga Gjykata Kushtetuese.

“Në paragrafin 61 të vendimit nr. 55/2024 të Gjykatës Kushtetuese theksohet se: ‘Gjykata vlerëson se Kuvendi nuk ka vepruar në përputhje me Kushtetutën për sa kohë çështjen e ekzekutimit të vendimit të saj ia ka nënshtruar vlerësimit të Këshillit për Legjislacionin dhe Këshillit për Mandatet, struktura në të cilat shumica parlamentare ka vënë në dyshim fuqinë detyruese të vendimit të Gjykatës, ka thirrur ekspert të jashtëm dhe, më pas, ka vlerësuar se çështja duhet t’i përcillet për votim seancës plenare”, deklaron Bardhi.

Sipas tij, zvarritja 2-vjeçare e kësaj çështjeje dhe moszbatimi i dy vendimeve të Gjykatës Kushtetuese është mbrojtje politike nga drejtësia të një deputetje të shumicës, bashkëpunëtore e ngushtë e Edi Ramës.

“Është e papranueshme mbrojtja politike dhe pengimi ndaj drejtësisë që mazhoranca po bën për rastin e ish-ministres dhe deputetes Olta Xhaçka, duke injoruar Kushtetutën dhe duke penguar zbatimin e dy vendimeve të Gjykatës Kushtetuese. Dënojmë me forcë standardin “një drejtësi për Edi Ramën dhe një drejtësi tjetër për gjithë të tjerët”.  Në çdo vend demokratik zbatimi i vendimeve të Gjykatës Kushtetuese është i detyrueshëm dhe themeli mbi të cilin ngrihet një shtet ligjor”, deklaron Bardhi. 

Mandati i Xhaçkës, Këshilli i Legjislacionit mblidhet në 27 gusht

Këshilli për Legjislacionin do të zhvillojë në datën 27 gusht një mbledhje jashtë sesionit parlamentar, ku do të shqyrtojë vendimin e Gjykatës Kushtetuese për mandatin e deputetes së Partisë Socialiste, Olta Xhaçka.

Përmes një njoftimi për shtyp nga Kuvendi, bëhet e ditur se në datën 27 gusht, ora 11:00, në Kryesinë e Kuvendit, do të zhvillohet jashtë sesionit parlamentar, mbledhja e Këshillit për Legjislacionin.

Mbledhja është thirrur me urdhër të kryetares së Kuvendit, Elisa Spiropali dhe Këshilli për Legjislacionin, do të shqyrtojë vendimin nr. 55, datë 10 korrik 2024, të Gjykatës Kushtetuese.

Partia Demokratike kërkoi të mërkurën mbledhjen urgjente të Kuvendit në një seancë të jashtëzakonshme, lidhur me vendimin e Kushtetueses për mandatin e Olta Xhaçkës.

/rtsh.al/