Tiranë/ Kërcënon me mjet prerës drejtuesin e taksisë dhe e grabit, shoqërohet në polici autori i dyshuar

Një ngjarje kriminale është regjistruar pasditen e sotme në aksin rrugor “Tiranë-Elbasan”, ku një shofer taksie ka rënë pre e një grabitjeje nën kërcënimin e armës së ftohtë. Lajmi është bërë i ditur përmes një njoftimi paraprak nga Policia e Shtetit.

Sipas të dhënave zyrtare, ngjarja ka ndodhur rreth orës 14:30. Autoritetet sqaruan se “një shtetas, dyshohet se duke kanosur me mjet prerës, drejtuesin e taksisë me të cilën lëvizte në aksin rrugor “Tiranë-Elbasan”, i ka vjedhur një shumë parash dhe një varëse”.

Menjëherë pas sinjalizimit, në terren janë angazhuar forcat e rendit për ndjekjen dhe kapjen e personit të përfshirë në ngjarje.

“Si rezultat i reagimit të shpejtë të shërbimeve të Policisë, autori i dyshuar është lokalizuar, neutralizuar dhe po shoqërohet në ambientet e Policisë”, bëhet e ditur në njoftimin zyrtar.

Aktualisht, strukturat hetimore po kryejnë procedurat e nevojshme ligjore për dokumentimin e plotë të veprës penale.

Lidhur me dinamikën e detajuar dhe identitetin e personave të përfshirë, autoritetet shtuan se “në përfundim të veprimeve procedurale për rastin, do të ketë njoftim të plotë”.

/rtsh.al/