Turistët udhëtojnë nga e gjithë bota për të notuar me peshkaqenët balenë

Gjithçka nisi në vitin 2016, kur pamjet e rreth një duzine peshkaqenësh gjigantë balenë, pranë brigjeve të fshatit Botubarani në Indonezi, u bënë virale në rrjetet sociale.

Që atëherë, udhëtarë nga e gjithë bota kanë nisur të vizitojnë këtë zonë për të notuar pranë këtyre krijesave madhështore.

Banorët vendas, të cilët dikur siguronin jetesën vetëm përmes peshkimit, tashmë kanë gjetur një burim të ri të ardhurash. Ata japin me qira varka, organizojnë udhëtime zhytjeje dhe ofrojnë xhirime me dron për turistët.

Ky aktivitet është shndërruar në një burim të rëndësishëm të ardhurash për fshatin.

Megjithatë, popullariteti në rritje ka edhe anët negative. Peshkaqenët ushqehen rregullisht për t'i tërhequr pranë turistëve, ndërsa ambientalistët paralajmërojnë se kjo praktikë mund të ndryshojë sjelljen e tyre natyrore dhe të dëmtojë shëndetin e këtyre kafshëve.

Pavarësisht përfitimeve ekonomike, kjo praktikë ka ngritur shqetësime për ndikimin e turizmit në jetën e egër detare. /Telegrafi/