Udhëheqësit e BE-së mbërrijnë në Indi për të nënshkruar një marrëveshje tregtare

Udhëheqësit më të lartë të Evropës kanë mbërritur në Nju Delhi për të marrë pjesë në festimet e Ditës së Republikës të hënën, përpara një Samiti kyç BE-Indi dhe përfundimit të një marrëveshjeje të shumëpritur të tregtisë së lirë.

Presidenti i Këshillit Evropian Antonio Luis Santos da Costa dhe Presidentja e Komisionit Evropian Ursula von der Leyen mbërritën në Indi gjatë fundjavës, të ftuar si të ftuarit kryesorë të paradës së 77-të të Ditës së Republikës.Costa dhe Presidentja e Komisionit Evropian, Ursula von der Leyen, janë të ftuarit kryesorë për festimet e Ditës së Republikës të këtij viti në New Delhi të hënën, përpara një samiti BE-Indi të martën, ku shpresojnë të shtrëngojnë duart për marrëveshjen , e përshkruar si “nëna e të gjitha marrëveshjeve “.

“Presidenti Costa është në New Delhi për samitin e 16-të BE-Indi që zhvillohet të martën”, tha Këshilli i BE-së në X. “Samiti do të jetë një mundësi për të ndërtuar mbi partneritetin strategjik BE-Indi dhe për të forcuar më tej bashkëpunimin në fushat kryesore të politikave.”

India, kombi më i populluar në botë, është në rrugën e duhur për t’u bërë ekonomia e katërt më e madhe në botë këtë vit, sipas parashikimeve të Fondit Monetar Ndërkombëtar.

Ndërsa BE-ja e sheh Indinë si një treg të rëndësishëm për të ardhmen, Nju Delhi e sheh bllokun evropian si një burim të rëndësishëm të teknologjisë dhe investimeve shumë të nevojshme për të përmirësuar me shpejtësi infrastrukturën e saj dhe për të krijuar miliona vende të reja pune për njerëzit e saj.

“Jemi në prag të një marrëveshjeje historike tregtare”, tha Leyen përpara samitit.

Tregtia dypalëshe e mallrave arriti në 120 miliardë euro në vitin 2024, një rritje prej gati 90% gjatë dekadës së fundit, sipas shifrave të BE-së, me 60 miliardë euro të tjera në tregtinë e shërbimeve.

Pakti do të ishte një fitore e madhe për Brukselin dhe Nju Delhin, pasi të dy kërkojnë të hapin tregje të reja përballë tarifave amerikane dhe kontrolleve kineze të eksporteve.

“BE-ja dhe India po i afrohen më shumë njëra-tjetrës në një kohë kur rendi ndërkombëtar i bazuar në rregulla është nën një presion të paparë përmes luftërave, shtrëngimit dhe fragmentimit ekonomik”, tha të mërkurën diplomatja më e lartë e BE-së, Kaja Kallas.

Megjithatë, negociatat janë ende në vazhdim, me bisedimet që përqendrohen në disa pika ngërçuese, duke përfshirë ndikimin e taksës kufitare të karbonit të BE-së mbi eksportet e çelikut dhe standardet e sigurisë dhe cilësisë në sektorët farmaceutikë dhe automobilistikë, sipas njerëzve të njohur me diskutimet.

Nju Delhi, i cili është mbështetur te Moska për dekada të tëra për pajisje kryesore ushtarake, është përpjekur të ulë varësinë nga Rusia vitet e fundit duke diversifikuar importet dhe duke nxitur bazën e vet të prodhimit vendas.

Evropa po bën të njëjtën gjë në raport me Shtetet e Bashkuara.

/rtsh.al/