VILNIUS – Merz zotohet të mbrojë “çdo centimetër” të territorit të NATO-s
VILNIUS, 23 maj /ATSH/- Gjermania dhe partnerët e saj në NATO janë të përgatitur të mbrojnë çdo centimetër të territorit të aleancës, tha sot kancelari gjerman, Friedrich Merz në një ceremoni ushtarake në Vilnius – për të shënuar krijimin e brigadës gjermane në Lituani, sipas “Financial Times”.
Brigada me mijëra trupa në krahun lindor të NATO-s është pjesë e përpjekjeve evropiane – për të forcuar mbrojtjen e rajonit në përgjigje të pushtimit të Ukrainës nga Rusia dhe presionit te presidentit te SHBA-së Donald Trump mbi aleatët që të investojnë më shumë në sigurinë e tyre.
“Siguria e aleatëve baltikë është gjithashtu siguria jonë”, tha kancelari i ri gjerman, Merz ndërsa mori pjesë në një paradë ushtarake në Vilnius – për të nderuar brigadën e re të 45-të të blinduar të ushtrisë gjermane me bazë në Lituani.
Dislokimi u vendos në vitin 2023 pas pushtimit të plotë të Ukrainës nga Rusia, i cili përforcoi frikën në tre ish-republikat sovjetike se ato mund të ishin të radhës.
Dislokimi numëron rreth 400 ushtarë. Kapaciteti i plotë prej 5,000 trupash pritet të arrihet deri në vitin 2027 – një afat kohor që pasqyron shkallën e sfidës për forcat e armatosura gjermane, si dhe për mikpritësit e tyre lituanezë.
Vendi më i madh i Evropës e sheh angazhimin për të stacionuar një brigadë të përhershme në vendin e vogël baltik – si një pjesë të rëndësishme të Zeitenwende – ose ndryshimit të detit – në rolin e tij në mbrojtjen e kontinentit pasi Vladimir Putin urdhëroi pushtimin e Ukrainës në vitin 2022.
Ky ndryshim u njoftua nga kancelari i atëhershëm, Olaf Scholz, i cili gjithashtu krijoi një fond të posaçëm prej 100 miliardë eurosh – për të riparuar forcat e armatosura gjermane, të cilat kishin vuajtur nga mungesa e investimeve, prej disa dekada.
Merz, i cili mori detyrën këtë muaj, e ka paraqitur veten si një mbështetës i vendosur i Ukrainës dhe të NATO-s.
Kancelari gjerman është zotuar ta bëjë ushtrinë gjermane – ushtrinë më të fortë konvencionale në Evropë – duke ndryshuar rregullat e rrepta të huamarrjes së vendit për të lejuar shpenzime të pakufizuara për mbrojtjen – dhe duke mbështetur objektivin e ri të shpenzimeve të NATO-s deri në 5% të PBB-së. //a.i/