Vendimi i Hagës hap debatin për reformën e Dhomave të Specializuara, Agim Krasniqi: Duhet rishikuar juridiksioni

Analisti dhe juristi Agim Krasniqi ka komentuar në “Edicionin Qendror” të Vizion Plus, me moderator Aleksandër Furxhi, nismën e Partisë Demokratike të Kosovës për ndryshimin e kuadrit ligjor që lidhet me Dhomat e Specializuara të Kosovës në Hagë.

Krasniqi e cilësoi nismën si reagimin e parë institucional pas vendimit të fundit të Hagës, duke thënë se ajo ngre pyetje mbi misionin dhe funksionimin e Dhomave të Specializuara. Sipas tij, megjithatë, duhet bërë dallimi mes vullnetit politik dhe efektit juridik. Ai argumentoi se çdo ndryshim duhet të jetë pjesë e një reforme që rishikon juridiksionin, forcon mbikëqyrjen dhe garanton të drejtat e të akuzuarve, duke respektuar Kushtetutën dhe detyrimet ndërkombëtare.

I pyetur nëse subjektet e tjera politike në Kosovë, përfshirë LDK-në dhe Aleancën, mund t’i bashkohen nismës së PDK-së, Krasniqi u shpreh se do të duhej që të gjitha subjektet të angazhoheshin në këtë proces. Sipas tij, nisma nuk duhet të shihet si përpjekje për të zhbërë Gjykatën Speciale, por si një mundësi për të rishikuar mënyrën e funksionimit të saj dhe për të garantuar trajtim të drejtë për të akuzuarit.

Krasniqi ngriti gjithashtu pikëpyetje lidhur me mënyrën e trajtimit të dëshmitarëve dhe arsyetimin juridik të vendimit, duke theksuar se mbetet për t’u parë argumentimi i plotë i gjykatës. Ai tha se rruga e Apelit duhet të përdoret për të kërkuar siguri juridike dhe për të kundërshtuar elementet e vendimit që mbrojtja i konsideron të pabazuara.

Sa i përket qëndrimit të Shteteve të Bashkuara dhe Bashkimit Evropian, të cilat e kanë mirëpritur aktgjykimin e Hagës, analisti tha se mbështetja ndaj vendimit nuk e përjashton mundësinë e apelimit. “Ata nuk kanë thënë që në shkallën e Apelit të mos ankimohet apo të mos kërkohet pafajësia”, u shpreh Krasniqi, duke shtuar se çështja duhet të vijojë përmes procedurave të përcaktuara ligjërisht.

/vizionplus.tv